Elimizde 2026 jyldyń І toqsanynda 77 aǵza transplantattaldy
ASTANA. KAZINFORM – Qazaqstanda aǵzany transplantattaýǵa suranys joǵary deńgeıde saqtalyp otyr. Qazirgi ýaqytta myńdaǵan patsıent úshin aǵzany aýystyrý operatsııalary ómirdi saqtap qalý jáne tolyqqandy ómir súrýge oralý múmkindigin qamtamasyz etedi.
Keıingi úsh jylda elimizde transplantattaý operatsııalarynyń sany artyp keledi. 2023 jyly 236 operatsııa jasalǵan bolsa, 2024 jyly bul kórsetkish 260-qa, al 2025 jyly 310-ǵa jetti. Bul keıingi jyldardaǵy eń joǵarǵy kórsetkish sanalady.
2026 jyldyń birinshi toqsanynda 77 transplantattaý operatsııasy oryndaldy, onyń ishinde tiri donorlardan 55, qaıtys bolǵan donorlardan 22 operatsııa jasaldy. Operatsııalar búırek, baýyr, júrek, ókpe jáne móldir qabyqty aýystyrýdy qamtıdy.
Balalar transplantologııasyn damytýǵa erekshe kóńil bólinip keledi. 2025 jyly balalarǵa 16 aǵza aýystyrý operatsııasy júrgizildi.
Sonymen birge, transplantattaýdy kútip otyrǵan patsıentterdiń sany áli de joǵary deńgeıde qalyp otyr. Qazirgi ýaqytta kútý tiziminde 4 600-den astam adam bar, onyń ishinde 119 bala bar. Eń kóp qajettilik búırek transplantattaýǵa qatysty – 4 102 patsıent, baýyr transplantattaýdy 267 adam, júrek transplantattaýdy 198 adam jáne ókpe transplantattaýdy 33 patsıent kútýde.
2023 jylmen salystyrǵanda kútý tizimindegi patsıentter sany 3,9 myńnan 4,6 myńǵa deıin ósti.
Transplantologııany damytýdaǵy mańyzdy faktorlardyń biri – qaıtys bolǵannan keıingi donorlyq jáne qoǵamdaǵy aǵza donorlyǵyn qoldaý mádenıetiniń qalyptasýy. Áleýetti qaıtys bolǵan donorlardyń sany 2023 jyly 49 bolsa, 2025 jyly 186-ǵa deıin ósti. 2026 jyldyń birinshi toqsanynda taǵy 55 áleýetti donor anyqtaldy.
Qaıtys bolǵannan keıingi donorlyqqa qatysty azamattardyń erikti kelisimi eGov portaly arqyly artyp keledi. 2023 jyly júıede 38,7 myń erik bildirý tirkelse, 2026 jylǵy sáýirde bul kórsetkish 156 myńnan asty. Alaıda, qaıtys bolǵannan keıingi donorlyqqa tek 15,1 myń adam kelisim bergen, al 140,8 myń azamat bas tartqan.
Buǵan deıin Qazaqstanda 4,6 myńnan astam adam aǵza transplantatsııasyn kútip júrgenin jazǵanbyz.
