Elimizde 2025 jyldyń 7 aıynda 608,8 myń tonna et óndirildi

ASTANA. KAZINFORM – Keıingi ýaqytta aqparattyq keńistikte sıyr eti baǵasynyń ósýi men ishki naryqta et tapshylyǵynyń yqtımaldyǵyna qatysty alańdaýshylyq baıqalyp otyr. Alaıda 2025 jyldyń 7 aıyndaǵy naqty derekter saladaǵy turaqtylyq pen oń dınamıkany kórsetedi.

Shilde aıynyń sońyndaǵy jaǵdaı boıynsha iri qara mal basy 8,7 mln basqa jetti, onyń 4,5 mln sıyr (+3,1%). Buzaýlardyń sany 2,7 mln basqa deıin ósti (+17,9%), bul óndiris kólemin odan ári arttyrýǵa negiz bolyp otyr. 

Qańtar-shilde aılarynda elde 608,8 myń tonna et óndirildi (+1,8%), onyń ishinde 205,7 myń tonnasy sıyr eti. Bul ishki naryqta jetkilikti usynystyń baryn jáne salanyń turaqty damýyn rastaıdy.

Óndirýshilerden iri qara maldyń tirideı salmaqtaǵy kóterme baǵasy 2 400–3 100 teńge/kg, bólshek saýdada – 3 000–3 700 teńge/kg aralyǵynda, óńirlerge qaraı ózgerip otyrady. Baǵanyń ósýi ishki faktorlarǵa baılanysty: selektsııalyq-asyl tuqymdyq jumysty sýbsıdııalaý toqtatyldy, energııa resýrstary ósti (elektr energııasy +11,3%, gaz +15,9%, sý +96%-ǵa deıin), jem-shóp, JJM, veterınarlyq preparattar quny artty, AÓK-degi jalaqy kóterildi, sondaı-aq jetkizý tizbegindegi deldaldardyń áseri baıqalady.

Sonymen qatar qazaqstandyq sıyr etine syrtqy naryqtaǵy suranys artyp keledi. Qańtar–maýsym aılarynda eksport kólemi 16,1 myń tonnany qurap, 2,4 ese ósti. Negizgi baǵyttar – Ózbekstan, Tájikstan, Qyrǵyzstan, Qytaı jáne BAÁ. Bul otandyq ónimniń sapasy men básekege qabilettiligin dáleldeıdi. 

Qazirgi tańda bordaqylaý alańdarynyń júktemesi 35–40%-dy quraıdy. Ony arttyrý maqsatynda 2025 jylǵy 1 tamyzdan bastap jyldyq 5%-ben 12 aıǵa jeńildetilgen kredıtteý baǵdarlamasy engizildi. Bul maqsatqa 50 mlrd teńge bólindi. Baǵdarlama jas maldy, jem-shópti, JJM men jabdyqty satyp alýdy qarjylandyrady jáne bordaqylaý alańdarynyń júktemesin 60%-ǵa jáne odan joǵary deńgeıge jetkizýge múmkindik beredi. 

Baǵanyń ósýine qaramastan, qazirgi sıyr eti quny óndirýshiler úshin áli de tabysty bolyp otyr. Memlekettik qoldaý usynystyń qysqarýyna emes, artýyna yqpal etip, ishki naryqtyń qajettilikterin tolyq qamtamasyz etip keledi. 

Osylaısha, et salasyndaǵy jaǵdaı baqylaýda jáne eldiń azyq-túlik qaýipsizdigin nyǵaıtýǵa, turaqty damýǵa jańa múmkindikter ashady.