Elimizde 19-25 sáýir aralyǵynda Eýropalyq ımmýndaý aptalyǵy ótedi

Soltústik Qazaqstan oblysy sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, ımmýndýa aptalyǵy 2012 jyldan bastap jylda sáýir aıynyń sońǵy aptasynda atap ótiledi. Maqsaty - vaktsına arqyly aldyn alýǵa bolatyn aýrýlardan qorǵaýda barlyq jastaǵy adamdardy ımmýndaýdyń mańyzyn nasıhattaýǵa baǵyttalǵan.

- Vaktsınatsııa — medıtsına tarıhyndaǵy eń qýatty quraldardyń biri. Sońǵy jarty ǵasyrda vaktsınalar 150 mln astam adamnyń ómirin saqtap qaldy. Bul - mıllıondaǵan adamnyń óz jaqyndaryn qorǵaý týraly qabyldaǵan sheshimderiniń nátıjesi. Elestetip kórińiz: 50 jyl boıy kún saıyn mınýtyna 6 adam qutqarylǵan.

Bul - qyzylsha, dıfterııa, kókjótel jáne polıomıelıt sııaqty aýrýlarsyz bolashaqty tańdaǵan birneshe býynnyń nátıjesi, - deıdi Arman Kúshbasov.

Mamannyń aıtýynsha, vaktsınatsııany tańdaý náreste ólimin 40% tómendetýge múmkindik berip, ondaǵan mıllıon balany múgedektikten saqtap qaldy. Degenmen, jyldar boıy qol jetkizilgen bul jetistikke qazir qaýip tóngen. Jyl saıyn álemde shamamen 20 mln bala qajetti vaktsınalardy almaıdy, onyń 14 mln astamy birde-bir ekpe almaǵan. Bul balalardyń kópshiligi medıtsına nashar damyǵan aımaqtarda ómir súredi. Sonymen qatar, jalǵan jáne jańylystyratyn aqparat ta kedergi keltirý ústinde.

- 2026 jyly Eýropalyq ımmýndaý aptalyǵy 19–25 sáýir aralyǵynda «Vaktsınalar ár urpaq úshin jumys isteıdi» uranymen ótedi. Bul naýqan vaktsınatsııanyń kóptegen jyldar boıy adamdardy, otbasylardy jáne tutas qoǵamdardy qaýipsiz qorǵap kelgenin, bolashaqta da qorǵaýdy jalǵastyratynyn eske salady.

Naýqan halyqtyń vaktsınatsııaǵa degen senimi men yntasyn arttyrýǵa, sondaı-aq medıtsına qyzmetkerlerin qoldaýǵa baǵyttalǵan, - deıdi Arman Kúshbasov. 

Qazirgi ýaqytta elimizde respýblıkalyq bıýdjet esebinen 21 ınfektsııalyq jáne parazıttik aýrýǵa qarsy mindetti profılaktıkalyq egýler júrgiziledi. Vaktsınatsııa egiletin adamnyń kelisimimen júzege asyrylady.

- Josparly profılaktıkalyq egýler: «A» vırýstyq gepatıti, «V» vırýstyq gepatıti, b tıpti gemofıldi ınfektsııa, dıfterııa, kókjótel, qyzylsha, qyzamyq, pnevmokokk ınfektsııasy, polıomıelıt, sirespe, týberkýlez, epıdemııalyq parotıt, adam papılloma vırýsyna; epıdemıologııalyq kórsetkishter boıynsha egýler: qutyrý, ish súzegi, kóktemgi-jazǵy kene entsefalıti, oba, koronavırýs ınfektsııasy, sibir jarasy, tumaý, týlıaremııa boıynsha júrgiziledi.

Eýropalyq ımmýndaý aptalyǵy kezeńinde barlyq nıet bildirgen eresekter men balalar, sonyń ishinde basqa elderden kelgen, tirkeýsiz turatyn, turaqty turǵylyqty jeri joqtar aýmaqtyq emhanalarǵa baryp, tegin ekpe ala alady, - deıdi Arman Kúshbasov. 

Buǵan deıin Qazaqstanda qyzylshamen syrqattanýshylyq 30% tómendegenin jazǵan edik.