Elimizde 178 mlrd teńgege jýyq qaıta óńdeletin qaldyqtar polıgonda kómilip jatyr
ASTANA. KAZINFORM — Qazaqstanda qaıta óńdeýge bolatyn qaldyqtar kómilip jatyr. Májiliste Respublica fraktsııasy qatty turmystyq qaldyqtardy óńdeý salasyndaǵy olqylyqtar boıynsha dóńgelek ústel ótkizdi.
Partııanyń habarlaýynsha, bul problema jyldar boıy nazardan tys qalyp keledi. Qazaqstan qaldyqtardy qaıta óńdeý boıynsha álemde 179 eldiń ishinde 175-orynda tur. Kórsetkish — nebári 3,8%.
Salystyrmaly túrde kórshiles Ózbekstan qaıta óńdeýdi 31,6%-ǵa jetkizip, zaýyttar salyp, halyqaralyq kompanııalardy shıkizatpen qamtyp otyr. Al Qyrǵyzstan polıetılenge ishinara tyıym engizdi.
— Búgin kómip jatqan plastık júzdegen jyl boıy topyraq pen jerasty sýyn ýlaıdy. Biz tabıǵatqa orny tolmas zııan keltirip, balalarymyzǵa ýlanǵan aýmaq qaldyryp jatyrmyz. Erteń olar qaıda ómir súredi, qaıda úı salady, balalaryn qaıda ósiredi? Kóp adam ekologııa — erteńgi kúnniń máselesi dep oılaıdy. Joq, biz ony dál qazir, óz áreketimizben ne áreketsizdigimizben qalyptastyryp jatyrmyz. Partııa mundaı jaǵdaımen kelispeıdi, — deıdi Respublica partııasynyń tóraǵasy Aıdarbek Qojanazarov.
Parlamenttik baqylaý negizgi mehanızmniń isten shyqqanyn da, qaýipti tendentsııalardy da anyqtady. Májilis depýtaty Nurgúl Taý saladaǵy negizgi máselelerdi atady.
— Elde qaldyqtardyń naqty kólemi týraly eshbir derek joq, biraq soǵan qaramastan orasan qýatty qoqys jaǵý zaýyttaryn salý boıynsha ınvestıtsııalyq kelisimder jasalǵan. Sonda olardyń qýaty nege negizdelgen? Eger naqty derek bolmasa, olar neni jaǵady?, — deıdi depýtat.
Respublica fraktsııasy Úkimetke ROP reformasyn jasaýdy usynyp otyr. Sebebi «Jasyl damý» AQ úsh jylda josparlanǵan 7,5 mlrd teńgeniń ornyna jınaýshylarǵa tek 4,6 mln teńge (0,06%) tólegen. Bul qaıta óńdeý kásiporyndarynyń jappaı jabylýyna ákeldi.
— Bizdiń maqsat — syn aıtý emes, naqty jol kartasyn ázirleý. Biz ROP qarajatynyń ashyqtyǵyn qamtamasyz etýdi, óndirýshilerdiń ujymdyq jaýapkershiligin engizýdi jáne ımmıtatsııa emes, shyn máninde jumys isteıtin qaıta óńdeý júıesin qalyptastyrýdy talap etemiz, — dedi Nurgúl Taý.
Otyrysta memlekettik organ men bıznes ókilderi de óz pozıtsııalaryn bildirdi.
QR Ekologııa jáne tabıǵı resýrstar vıtse-mınıstri Nurlan Qurmalaevtyń aıtýynsha, elde 3 myńǵa jýyq polıgon bar, onyń 80%-y ekologııalyq talaptarǵa saı emes. Kópshiligi 1970-1990 jyldary qorǵanys júıelerinsiz salynǵan. Bólek jınaý damymaǵan. Al zamanaýı polıgondar salýǵa bıýdjet qarajaty jetkiliksiz.
Respublica fraktsııasy Úkimetten naqty sheshimder qabyldaýdy talap etip, qaldyqtardy basqarý júıesin túbegeıli reformalaıtyn Ulttyq baǵdarlama ázirleý úshin jumys tobyn qurýdy usynyp otyr.
Aıta keteıik, Pavlodardyń tórt aýdanynda turmystyq qaldyqqa arnalǵan polıgondar salynady.
Alataý qalasynda alapat órt bolǵan qoqys polıgony jabyldy.