Elimizde 17,7 mln teńgelik kúrdeli otanyń aqysyn MÁMS tóledi
ASTANA. KAZINFORM — Diń jasýshalaryn transplantatsııalaý — medıtsınalyq kómektiń eń kúrdeli ári qymbat túriniń biri. Qazan aıynda osyndaı bir operatsııanyń quny 17 684 387 teńge bolǵan. Shyǵynnyń tolyq somasy mindetti áleýmettik medıtsınalyq saqtandyrý (MÁMS) esebinen óteldi.
2026 jyldyń alǵashqy toǵyz aıynda Qazaqstanda balalarǵa diń jasýshalaryn transplantatsııalaý boıynsha 36 operatsııa jasalǵan.
Mundaı otalar qan men súıek kemiginiń aýyr aýrýlaryn emdeý úshin qoldanylady. Transplantatsııa aýrýdyń nemese qarqyndy emniń saldarynan buzylǵan qan túzý júıesin qalpyna keltirýge múmkindik beredi.
Medıtsınalyq kórsetkishterge qaraı naýqasqa óziniń diń jasýshalary nemese donordyń jasýshalary kóshirilýi múmkin. Bul protsedýra arnaıy daıyndyqty, joǵary tehnologııalyq jabdyqty jáne uzaq ýaqyt medıtsınalyq baqylaýdy qajet etedi.
Qordyń málimetinshe, medıtsınalyq kórsetkishter bolǵan jaǵdaıda qymbat emniń aqysyn MÁMS júıesi arqyly tóleýge bolady. Al 18 jasqa tolmaǵan balalar saqtandyrylǵan azamattardyń jeńildik sanatyna kiredi. Olar úshin jarnalardy memleket tóleıdi.
Eske salaıyq, buǵan deıin Almatyda 8 jastaǵy balanyń mıyna kúrdeli ota jasalǵanyn jazǵanbyz.