2031 jylǵa qaraı elimizde 1,6 mln kadr qajet – Eńbek mınıstrligi
ASTANA. KAZINFORM – Aldaǵy 5-6 jylda elimizde qurylys, aýyl sharýashylyǵy, óńdeý ónerkásibi jáne densaýlyq saqtaý salasy mamandary suranysqa ıe bolady. Tolyǵyraq Eńbek jáne halyqty áleýmettik qorǵaý vıtse-mınıstri Asqar Bıahmetov aıtyp berdi.
- Aldaǵy 6 jylda kadr boıynsha jıyntyq suranys 1,6 mln adam bolyp otyr. Onyń ishinde shamamen 900 myń kásiptik-tehnıkalyq bilimi bar qyzmetker jáne 400 myńnan astam jumysshy mamandar qajet. Jumysshy kadrlar negizinen qurylys, aýyl sharýashylyǵy, óńdeý ónerkásibi jáne densaýlyq saqtaý salasynda suranysqa ıe, bul jumysshy mamandardyń 56%. Osy oraıda ortalyq memlekettik organdar men óńir ákimdikteri jumysshy mamandyqtary jyly sheńberinde is-sharalar josparyn iske asyrýdy bastady. Memlekettik organdardyń josparyna sáıkes jańa kásiporyndar ashý men jańa jumys oryndaryn qurý (turaqty jáne ýaqytsha) negizgi mindet, – dedi Asqar Bıahmetov ortalyq kommýnıkatsııalar qyzmeti alańynda ótken baspasóz máslıhatynda.
Sondaı-aq mınıstrdiń orynbasary «Jastar praktıkasy» jobasy jalǵasyn tabatynyn aıtty.
- Joba aıasynda jas mamandardy daıarlaýǵa keminde 35 myń tálimgerdi tartý josparda bar. Sonymen qatar jumyssyz azamattardy 6 aıdan aspaıtyn kásiptik oqytý uıymdastyrylady. Osy oraıda bıyl 100 kásiptik standart ázirlenip, jańartylady. Odan bólek biliktilikti baǵalaıtyn 4 táýelsiz ortalyq jumys isteıdi, 5-inshi ortalyqty ashý josparlanyp otyr, onyń ishinde halyqaralyq standarttar boıynsha 2 ortalyq bolmaq, - dep tolyqtyrdy vıtse-mınıstr.
Buǵan deıin habarlaǵanymyzdaı byltyr elimizde 714 myń adam turaqty jumyspen qamtyldy.
Aıta ketsek, búgin Premer-mınıstrdiń orynbasary Ermek Kósherbaev Senatta ótip jatqan parlamenttik tyńdaýda 2030 jylǵa qaraı qaı salalarda jumysshy mamandar tapshy bolatynyn aıtty.