Elimizde 1300 densaýlyq saqtaý nysany ashyldy – Toqaev
ASTANA. KAZINFORM – Memleket basshysy Qasym-Jomart Toqaev Parlament palatalarynyń birlesken otyrysynda medıtsınany damytý sharalary jóninde málimdeme jasady.
– Otandyq medıtsına salasy da damyp keledi. Jalpy, 2019 jyldan beri elimizde shamamen 1300 densaýlyq saqtaý nysany ashyldy.
Azamattardyń ortasha ómir súrý uzaqtyǵy 76 jasqa jýyqtady. Dúnıejúzilik banktiń málimetine sáıkes, osy kórsetkish boıynsha Qazaqstan osy aımaqta kósh bastap tur. Bul el damýynyń naqty kórinisi ekeni sózsiz. Azamattardyń bárine saqtandyrý mártebesine qaramastan bazalyq medıtsınalyq kómek alýǵa kepildik berilgen. Budan bólek, otandastarymyzǵa neırohırýrgııadan bastap reprodýktıvti medıtsınaǵa deıingi eń joǵary tehnologııalyq medıtsınalyq em-sharalardyń barlyǵy qoljetimdi, – dedi Prezıdent.
Sonymen qatar qoǵamǵa qyzmet etý jolyn tańdaǵandardyń alańsyz eńbek etýine laıyqty jaǵdaı jasalyp jatyr. Naqty qadamdar arqyly ustazdar men dárigerlerdiń bedeli arta bermek.
– Muǵalimderdiń, medıtsınalyq jáne áleýmettik qyzmetkerlerdiń jalaqysy kezeń-kezeńimen kóterilip keledi.
Sońǵy úsh jylda 1,2 mıllıonnan astam adamnyń eńbekaqysy 50 paıyzdan 100 paıyzǵa deıin artty, – dedi Memleket basshysy.
Aıta keteıik, buǵan deıin Prezıdent túpki maqsat — jahandyq tehnologııalyq landshaftta ornyqqan ozyq tsıfrlyq memleket qurý dep málimdegenin jarııalaǵanbyz.
