Elimizde 1,3 mln gektar aýyl sharýashylyǵy jeri memleketke qaıtaryldy
ASTANA. KAZINFORM – Elimizde paıdalanylmaı jatqan, sondaı-aq zańnama talaptary saqtalmaı ıgerilip jatqan aýyl sharýashylyǵy jerlerin anyqtaý jáne memleket menshigine qaıtarý jumystary jalǵasyp jatyr.
Bıyl jyldyń basynan beri QR Aýyl sharýashylyǵy mınıstrligi Jer resýrstaryn basqarý komıtetiniń aýmaqtyq bólimsheleri myńnan astam jospardan tys tekserý júrgizdi, ol 1 mln gektardan astam aýmaqty qamtydy.
Nátıjesinde 1,3 mln gektar aýyl sharýashylyǵy alqaby memleket menshigine qaıtaryldy. Basty mindet – paıdalanylmaı jatqan jerlerdi memleket menshigine qaıtarýmen shektelmeı, olardy keıinnen aýyl sharýashylyǵy aınalymyna engizý.
Bul jumys aýyl turǵyndaryn jaıylymdyq jerlermen qamtamasyz etýge, sondaı-aq agrarlyq óndiristi damytý úshin qosymsha jer resýrstaryn usynýǵa baǵyttalǵan.
2026 jylǵy qyrkúıek aıynyń basyndaǵy jaǵdaı boıynsha elimizde qaıta bólingen jerlerdiń jalpy kólemi 13,5 mln gektar boldy. Onyń 5,5 mln gektary aýyl sharýashylyǵy janýarlaryn jaıý jáne ortaq paıdalanylatyn jaıylym tapshylyǵyn sheshý maqsatynda jergilikti halyqtyń ortaq paıdalanýyna berildi. Al 8 mln gektar jer agroónerkásiptik keshen sýbektilerine aýyl sharýashylyǵy qyzmetin júrgizý jáne keńeıtý úshin konkýrs negizinde usynyldy.
Jer zańnamasynyń saqtalýyn baqylaýdy kúsheıtýmen qatar, jerdi adal ári tıimdi paıdalanatyn jer paıdalanýshylar úshin qolaıly jaǵdaı jasaý baǵytynda da sharalar qabyldanyp jatyr. Arnaıy qurylǵan jumys toby jer paıdalanýshylardyń adaldyǵyn baǵalaýdyń biryńǵaı ólshemsharttaryn belgileýdi, vedomstvoaralyq ózara is-qımyl merzimderin naqty retteýdi, sondaı-aq jer ýchaskelerine quqyqtardy uzartý rásimderin jeńildetýdi kózdeıtin ádistemelik usynymdardy bekitti.
Jer qatynastaryn jetildirýdegi mańyzdy kezeńderdiń biri – aýyl sharýashylyǵy maqsatyndaǵy jerlerdi berý tetigin tsıfrlandyrý.
2027 jylǵy 1 qańtardan bastap jer ýchaskelerin bólý elektrondyq formatta júzege asyrylady. Tsıfrlyq platforma arqyly ótkiziletin konkýrstar rásimderdiń ashyqtyǵyn qamtamasyz etip, adamı faktordyń yqpalyn barynsha azaıtady. Sonymen qatar qoldanystaǵy jer komıssııalarynyń jumys tetiginen bas tartýǵa múmkindik beredi.
Jańa tetikterdi resmı iske qosqanǵa deıin jańartylǵan tsıfrlyq platforma Aqmola oblysy men Jetisý oblysynda pılottyq joba aıasynda keshendi synaqtan ótkiziledi.
Aýyl sharýashylyǵy mınıstrligi paıdalanylmaı jatqan jerlerdi memleket menshigine qaıtarý, olardy tıimdi qaıta bólý jáne memlekettik baqylaý júıesin jetildirý jumystaryn jalǵastyrady. Qabyldanyp jatqan sharalar jer resýrstaryna ádil qoljetimdilikti qamtamasyz etýge, paıdalaný tıimdiligin arttyrýǵa jáne elimizdiń agroónerkásiptik kesheniniń turaqty damýyna qajetti jaǵdaı jasaýǵa baǵyttalǵan.
Aıta keteıik, Mańǵystaýda quny 175,7 mln teńgeniń jer ýchaskeleri memleketke qaıtaryldy.