Elimizde 13 600-den astam jol erejesin buzý deregi anyqtaldy

ASTANA. KAZINFORM — Elimizde «Tasymaldaýshy» respýblıkalyq aktsııasy aıasynda jolaýshylar qaýipsizdigine baqylaý kúsheıtildi. Bul týraly QR Kólik mınıstrliginiń baspasóz qyzmeti habarlady.

Avtomobıl kóligi jáne kóliktik baqylaý komıteti ákimshilik polıtsııa komıtetimen birge elimiz boıynsha aýqymdy reıdtik is-shara ótkizdi. Aktsııany Bas kólik prokýratýrasy uıymdastyrdy.

Basty maqsat — jolaýshylardyń qaýipsizdigin qamtamasyz etý jáne jol-kólik oqıǵalarynyń aldyn alý.

Aktsııa nátıjesinde 13,6 myńnan astam jol erejesin buzý deregi anyqtaldy.

• 1 167 — jolaýshylar men júkti tasymaldaý erejelerin buzý;
• 394 — jolaýshylar men júkti zańsyz tasymaldaý faktileri (kóbine taksı júrgizýshileri);
• 1 962 — tehnıkalyq baıqaýdan ótpegen nemese tehnıkalyq talaptarǵa sáıkes kelmeıtin kólik quraldary. 

Oń róldi kólikterdi tekserýge (Toyota Alphard, Estima jáne t. b.) erekshe nazar aýdaryldy. 213 qarsy baǵyttaǵy jolaqqa shyǵý deregi tirkeldi. Sondaı-aq, taksı júrgizýshileriniń bir táýlikte 5–6 aralyq reıs oryndaý jaǵdaılary jıi kezdesedi. Bul eńbek jáne demalys rejımin buzý bolyp sanalady.

— Júrgizýshiniń sharshaǵan kúıinde kólik basqarýy mas kúıde kólik júrgizýmen teń qaýip týdyrady, — dep atap ótti Avtomobıl kóligi jáne kóliktik baqylaý komıtetiniń qyzmetkerleri.

268 júrgizýshi kólikti mas kúıinde basqarsa, 2 506 júrgizýshi kólik basqarǵan kezde uıaly telefondy qoldanǵan.

Avtomobıl kóligi jáne kóliktik baqylaý komıteti tasymaldaýshylardy zań talaptaryn qatań saqtaýǵa, kólik quraldarynyń tehnıkalyq jaramdylyǵy men jolaýshylardyń qaýipsizdigin qamtamasyz etýge shaqyrady.

Profılaktıkalyq sharalar jalǵasyn tabady.

Aıta keteıik, Oralda jol erejesin 25 ret buzǵan 21 jastaǵy júrgizýshi jalǵan nómirmen júrgen.