Elimizde 12,6 mıllıon adam tabıǵı gazben qamtylǵan — Energetıka mınıstrligi
ASTANA. KAZINFORM – Gaz salasy búginde qarqyndy damýdyń jańa kezeńin bastan keshirip, el úshin strategııalyq mańyzǵa ıe bolyp otyr. Gazben qamtamasyz etý — mıllıondaǵan azamattardyń ómir súrý sapasyna tikeleı áser etetin basym mindetterdiń biri. Bul týraly Energetıka mınıstrligi málim etti.
Vedomstvonyń málimetinshe, qazirgi tańda el boıynsha gazdandyrý deńgeıi 62,4%-dy quraıdy. Bul 20,2 mln halyqtyń 12,6 mıllıonynan astamynyń tabıǵı gazǵa qol jetkizýin qamtamasyz etip otyr. Bul kórsetkish 2023 jylmen salystyrǵanda 2,4%-ǵa joǵary. Jyl sońyna deıin bul deńgeı 63,8%-ǵa jetkizilmek.
— Tek 2024 jyldyń ózinde 4000 shaqyrymnan astam gaz qubyry salynyp, 93 joba júzege asyryldy. Al 2025 jyly taǵy 77 jobany aıaqtap, 300 myńnan astam turǵyndy gazǵa qosý josparlanýda. Búginde tarıhı aýqymdaǵy jobalar iske asyrylýda: Qarashyǵanaqta, Jańaózende, Qashaǵanda gaz óńdeý zaýyttary salynyp jatyr. Qashaǵan GÓZ-iniń qýaty jylyna 1 mıllıard tekshe metr gazdy quraıdy, — delingen habarlamada.
Sonymen qatar, katarlyq seriktestermen birlesip strategııalyq mańyzy bar «Beıneý — Bozoı — Shymkent» magıstraldyq gaz qubyrynyń ekinshi jelisi salynyp jatyr. Anabaı, Rojkov jáne Óriktaý Shyǵys sııaqty jańa ken oryndaryn ıgerý júrip jatyr. Bıyl uzyndyǵy 300 km «Taldyqorǵan — Úsharal» magıstraldyq gaz qubyrynyń paıdalanýǵa berilýi josparlanǵan. Bul joba Jetisý óńirindegi 130 myńǵa jýyq halqy bar 66 eldi mekendi tabıǵı gazben qamtamasyz etedi. Nátıjesinde oblystyń gazdandyrý deńgeıi 47%-dan 90%-ǵa deıin ósedi. Sondaı-aq, «Saryarqa» magıstraldyq gaz qubyryn kezeń-kezeńimen Kókshetaý men Petropavlǵa deıin jetkizý de basym baǵyttardyń biri bolyp otyr.
Bul nysandar — kartadaǵy jaı ǵana núkteler emes, Qazaqstannyń energetıkalyq egemendigin nyǵaıtýǵa baǵyttalǵan naqty qadamdar. Ásirese, gazdandyrý eń kúrdeli ári qarjylyq shyǵyndy talap etetin soltústik jáne shyǵys óńirlerge erekshe kóńil bólinýde. Boljamdar boıynsha, aldaǵy jyldary elde gaz tutyný kólemi aıtarlyqtaı artady — 2025 jyly 21,2 mlrd tekshe metrden 2028 jylǵa qaraı 32,4 mlrd tekshe metrge jetpek. Buǵan eldiń ońtústiginde jańa parogaz elektr stantsııalarynyń iske qosylýy, munaı-gaz hımııasy men aýyr ónerkásiptegi aýqymdy jobalardyń júzege asyrylýy jáne óńirlerdiń jedel gazdandyrylýy yqpal etedi.
Búginde gaz — tek úılerdegi jylý ǵana emes, sonymen qatar jańa jumys oryndary, qalalardyń ekologııalyq saýyǵýy, eldiń energetıkalyq júıesiniń senimdiligi. Sala qyzmetkerleriniń eńbegi zor áleýmettik mańyzǵa ıe: olardyń arqasynda mıllıondaǵan qazaqstandyq órkenıettiń eń basty ıgilikteriniń birine qol jetkizdi. Gaz salasynyń damýy — Qazaqstannyń energetıkalyq qaýipsizdigi men ornyqty bolashaǵyna jasalǵan senimdi qadam.
Buǵan deıi habarlanǵandaı, bıyl 77 joba júzege asyp, 300 myń qazaqstandyq gazben qamtylmaq.