Elimizde 120-dan astam órt sóndirý deposyn salý qajet

ASTANA. KAZINFORM – QR Tótenshe jaǵdaılar mınıstrligi elimiz aýmaǵynda órt sóndirý depolary jetispeıtinin málim etti. 

«Qazirgi kezde el aýmaǵyn órtten qorǵaýdy 432 órt sóndirý bólimshesi atqaryp jatyr. Endi qosymsha 121 órt sóndirý deposyn salý qajet», - delingen mınıstrliktiń Kazinform agenttigine bergen jaýabynda.

Bul turǵyda vedomstvo 20 órt sóndirý beketiniń qurylysy júrip jatqanyn atap ótti.

«Órt sóndirý deposynyń qurylysy bıýdjetten bólingen qarajatqa qaraı kezeń-kezeńmen salynady», - dep atalyp ótken TJM aqparatynda.

Aıta keteıik, bıyldyń ózinde 150-ge jýyq tabıǵı órt tirkeldi.

«Osy jyly jaz ystyq bolýy múmkin, ıaǵnı órttiń shyǵý qaýpi joǵary. Qazirdiń ózinde elimiz boıynsha 27 orman órti jáne 122 dala órti tirkeldi. Olardyń kóbi mınıstrlik kúshteriniń, sonyń ishinde avıatsııanyń qatysýymen aýyzdyqtaldy», - delingen mınıstrlik habarlamasynda.