Elimizde 12 myń shaqyrym ınjenerlik jeli jóndeledi
ASTANA. KAZINFORM — Qazaqstanda kommýnaldyq jáne energetıkalyq jelilerdi jańǵyrtýǵa 13 trln teńge jumsalady, dep habarlaıdy Úkimettiń baspasóz qyzmeti.
Prezıdent tapsyrmalary aıasynda 2024 jylǵy jeltoqsanda qabyldanǵan «Energetıkalyq jáne kommýnaldyq sektorlardy jańǵyrtý» ulttyq jobasy aýqymdy jóndeý naýqany men ınfraqurylymdy jańartýdyń negizgi bastaý núktesine aınaldy.
— Qujat jeńildetilgen qarjylandyrýdy tartýǵa baǵyttalǵan jáne 200-den astam ınfraqurylymdyq kásiporyndardy qamtıdy. 2025–2029 jyldarǵa josparlanǵan ınvestıtsııalardyń jalpy kólemi 13 trln teńgeni quraıdy. Onyń ishinde 6,8 trln teńge kommýnaldyq sektorǵa, 6,2 trln teńge energetıka salasyna baǵyttalady. Jobanyń negizgi kórsetkishi — jelilerdiń tozý deńgeıin 40%-ǵa deıin tómendetý, bul apattar sanyn 20%-ǵa qysqartýǵa múmkindik beredi, — delingen habarlamada.
2025 jyly jobany júzege asyrýǵa 547 mlrd teńge baǵyttaldy. Osy qarajat esebinen 6,6 myń shaqyrym ınjenerlik jeli jóndelip, bul 8 tabıǵı monopolııa sýbektisin jelilerdiń tozýy boıynsha «qyzyl aımaqtan» shyǵarýǵa múmkindik berdi. Qaraǵandy, Pavlodar, Soltústik Qazaqstan, Túrkistan oblystary men Shymkent qalasynda 5 iri jobany júzege asyrý aıaqtaldy. Rásimderdi avtomattandyrý jáne ınvestıtsııalyq is-sharalardy irikteý úshin Elektrondyq satyp alý platformasy iske qosylyp, Úkimet janynan Jobalyq ofıs quryldy.
Infraqurylymdy jańartý jumystarynyń jalǵasy retinde elektrmen jáne jylýmen jabdyqtaý salalaryndaǵy naqty jobalardy júzege asyrýǵa erekshe nazar aýdarylyp otyr. Búginde Energetıka mınıstrligi jalpy quny 990,9 mlrd teńge bolatyn 393 jobany júzege asyrýdy qoldady. Olardyń jalpy uzyndyǵy shamamen 12 myń shaqyrymdy quraıdy. Onyń ishinde:
— elektrmen jabdyqtaý salasynda jalpy quny 541,7 mlrd teńge bolatyn, jalpy uzyndyǵy 11 714 shaqyrymdy quraıtyn 256 joba júzege asyrylýda;
— jylýmen jabdyqtaý salasynda jalpy quny 449,2 mlrd teńge bolatyn, jalpy uzyndyǵy 314 shaqyrymdy quraıtyn 137 joba júzege asyrylýda.
2026 jylǵa 1,1 trln teńge kóleminde qarjylandyrý kólemi bekitildi. Josparda — 12 myń shaqyrym jelini jóndeý, taǵy 8 kásiporyndy táýekel aımaǵynan shyǵarý jáne Smart Turmys tsıfrlyq platformasyn tolyq aýqymda engizý.
Budan bólek, otandyq taýar óndirýshilerdi qoldaýǵa da basymdyq berildi: 2029 jylǵa deıin olardyń ónimderine degen qajettilik 2 trln teńge kóleminde baǵalanady, al E-Ondiris platformasynda búginde 492 otandyq kásiporyn tirkelgen.
Osyǵan deıin habarlanǵandaı, 2027 jyly Qazaqstanda 845 MVt jańa energetıkalyq qýat iske qosylady.
