Elimizde 12 myń áleýmettik qyzmetker biliktiligin arttyrý kýrsynan ótti
ASTANA. KAZINFORM – Qazaqstanda áleýmettik qyzmetkerler ınstıtýtyn damytý jáne kórsetiletin áleýmettik qyzmetterdiń sapasyn arttyrý baǵytyndaǵy jumystar jalǵasyp jatyr. Bul týraly Eńbek jáne halyqty áleýmettik qorǵaý mınıstrligi habarlady.
Vedomstvonyń málimetinshe, áleýmettik qyzmetkerler qarttarǵa, múgedektigi bar adamdarǵa, balaly otbasylarǵa jáne qoldaýdy qajet etetin ózge de azamattarǵa kún saıyn qoldaý kórsetedi. Osyǵan baılanysty mınıstrlik olardy daıarlaý men kásibı biliktiligin arttyrý jumystaryn júıeli túrde júrgizip keledi.
«Sonyń arqasynda mamandar jańa bilim men tájirıbe jınaqtap, azamattarǵa sapaly ári ýaqytyly áleýmettik qoldaý usynady», – dep málimdedi mınıstrlik.
Qazirgi tańda elimizdiń áleýmettik qorǵaý júıesinde 12 myńǵa jýyq áleýmettik qyzmetker eńbek etedi. Onyń ishinde 1 251 maman úkimettik emes sektorda jumys isteıdi.
Áleýmettik qyzmetkerlerdiń 55,5%-y aýyldyq jerlerde, al 44,5%-y qalalarda qyzmet atqarady.
Olardyń basym bóligi – 9 532 maman arnaıy áleýmettik qyzmetterdi azamattardyń úıine baryp kórsetedi. Sonymen qatar 1 020 maman statsıonarlyq uıymdarda, 998 maman jartylaı statsıonarlyq mekemelerde, al 451 maman ýaqytsha bolý uıymdarynda eńbek etedi.
«Mınıstrlik áleýmettik qyzmetkerlerdi daıarlaý jáne olardyń kásibı deńgeıin jetildirý jumystaryn júıeli túrde jalǵastyryp keledi», – delingen habarlamada.
Aıta keteıik, Qazaqstanda psıhologtardyń biliktiligin tekserýdiń jańa tetigi engiziledi.
