Elimizde 100 myń tonna plastıktiń tek 3,5 myń tonnasy qaıta óńdeledi

ASTANA. KAZINFORM – Qaıtalama qaldyqtardy óńdeýdi arttyrýǵa ne kedergi? Qaldyqtardy qaıta óńdeýshilerdiń qandaı problemalary bar jáne ony qalaı sheshýge bolady? Osy jáne ózge de suraqtarǵa Qazaqstannyń qaıtalama shıkizatty qaıta óńdeýshiler qaýymdastyǵynyń tóraǵasy Batyrbek Áýbákirov jaýap berdi.

«Búginde Qazaqstanda polıgondardaǵy qaldyqtardy qaıta óńdeýdi reformalaý qajet. Mysaly, 100 myń tonna plastıktiń tek 3,5 myń tonnasy ǵana qaıta óńdeledi. Qaıtalama shıkizatty qaıta óńdeý, álemdegi eń perspektıvaly jáne tez damyp kele jatqan salalardyń biri. Bul oraıda qazaqstandyq bıznes te qaldyqtardy qaıta óńdeýge múddeli. Ony sheshýdiń birneshe joly bar, sonyń biri «EcoQolday» baǵdarlamasy, bıyl naýryzda Úkimettiń Ónerkásipti damytý qory arqyly «jasyl» jobalarǵa 3%-ben kredıt berý týraly qaýlysy kúshine endi», - dedi Batyrbek Áýbákirov qaıtalama shıkizatty qaıta óńdeý máselelerine arnalǵan konferentsııada. 

Sondaı-aq, qaýymdastyq tóraǵasy qaldyqtardy qaıta óńdeýshilerdiń birqatar problemasyn kóterdi. 

«Birinshiden, turaqty jumys isteýge múmkindik bermeıtin ornyqty shıkizat bazasynyń bolmaýy, kelesi, úshinshi eldermen teń emes saýda sharttary. Sonymen qatar shıkizat pen daıyn ónimge ár túrli kedendik mólsherlemeler men baǵamdyq aıyrmashylyqtardan týyndaǵan dempıng. Nátıjesinde bul faktorlar qazaqstandyq qaıta óńdeýshilerdiń básekege qabilettiligin, naryq úlesiniń joǵalýyn jáne óndiristik qýattardyń júktemesin tómendetedi», - deıdi ol. 

Osy oraıda atalǵan qaýymdastyq Úkimettiń nazaryna qaıtalama shıkizatty qaıta óńdeýdi damytý jáne qoldaý jónindegi jol kartasyn ázirlep, ony engizýdi usynbaq. 

Aıta keteıik, búgin Astanada «Qazaqstanda qaıtalama shıkizatty qaıta óńdeý: damý problemalary men perspektıvalary» taqyrybynda gıbrıdti formattaǵy halyqaralyq konferentsııa ótti.