Elimizde 10 jylda BAQ sany eki eseden astam ósti
ASTANA. KAZINFORM — Keıingi 10 jylda elimizde buqaralyq aqparat quraldarynyń sany eki eseden astam ósip, 5,5 myńǵa jýyqtady. Bul týraly Astana Media Week forýmynda Mádenıet jáne aqparat birinshi vıtse-mınıstri Qanat Ysqaqov málimdedi.
Bıyl 10 jyldyǵyn atap ótip jatqan forým «Medıa. Adam. Jasandy ıntellekt: on jyldyq ózgeris jáne senimniń jańa júıesi» taqyrybyna arnaldy.
Qanat Ysqaqovtyń aıtýynsha, 2017 jyly alǵash ret uıymdastyrylǵan Astana Media Week Qazaqstan men Ortalyq Azııadaǵy mańyzdy medıa alańdardyń birine aınaldy.
— On jyl buryn Qazaqstanda shamamen 2,5 myń BAQ tirkelgen edi. Ol kezde halyqtyń 75 paıyzy ınternetti paıdalansa, jańalyqtardyń negizgi kózi teledıdar bolatyn. Qazir elimizde 5,5 myńǵa jýyq BAQ bar, ınternet paıdalanýshylardyń úlesi 98 paıyzǵa jetti, — dedi ol.
Birinshi vıtse-mınıstrdiń sózinshe, halyqtyń aqparat alý daǵdysy da ózgergen. Qazir qazaqstandyqtardyń shamamen 45–50 paıyzy jańalyqtardy áleýmettik jeliler men messendjerler arqyly alady.
— Keıingi 10 jyldaǵy eń úlken ózgeris — medıanyń tsıfrlyq keńistikke kóshýi jáne jasandy ıntellekt quraldarynyń keńinen qoldanyla bastaýy. Osy eki faktor medıa salasyn túbegeıli ózgertti, — dedi Qanat Ysqaqov.
Onyń aıtýynsha, Telegram, Instagram, YouTube jáne TikTok aqparat taratýdyń mańyzdy arnalaryna aınaldy. Blogerler men áleýmettik jelidegi tanymal tulǵalar dástúrli BAQ-pen básekege túsip, qoǵamdyq pikirge yqpal etip otyr.
Birinshi vıtse-mınıstr jasandy ıntellekt medıa salasyna jańa múmkindikter ashqanymen, onyń qaýip-qateri de bar ekenin atap ótti.
Onyń sózinshe, bıyl Úkimet músheleriniń, ákimder men tanymal jýrnalısterdiń beınesi paıdalanylǵan dıpfeıkter taraǵan. Olar saıası arandatý jáne alaıaqtyq maqsatynda qoldanylǵan.
Qanat Ysqaqov osyǵan baılanysty medıasaýattylyqty arttyrý, aqparat kózderiniń qupııasyn saqtaý jáne derbes derekterdi qorǵaý mańyzdy ekenin aıtty.
Buǵan deıin Astana Media Week forýmy 14-16 qazan aralyǵynda ótetinin habarlaǵan edik.
