Elimizde 10 shildeden bastap birqatar avtojol aqyly bolady
ASTANA. KAZINFORM — «QazAvtoJol» UK» AQ respýblıkalyq mańyzy bar avtomobıl joldarynyń jekelegen ýchaskelerinde aqyly rejımniń kezeń-kezeńimen engiziletinin habarlaıdy.
2026 jylǵy 10 shildeden bastap Qaraǵandy — Balqash — Burylbaıtal jáne Burylbaıtal — Qurty ýchaskelerinde aqyly rejım qoldanyla bastaıdy. Al 2026 jylǵy 11 shildeden bastap Taldyqorǵan — Óskemen ýchaskesinde aqyly rejım engiziledi.
Barlyq ýchaskede qajetti ınfraqurylym daıyndalǵan. Kólik quraldaryn sáıkestendirý jáne jol júrý aqysyn esepteý avtomatty túrde júzege asyrylady, ıaǵnı baqylaý arkalary arqyly ótken kezde kóliktiń memlekettik tirkeý nómiri tirkeledi.
1. Qaraǵandy — Balqash — Burylbaıtal
Bul ýchaskede aqyly rejım 2026 jylǵy 10 shildeden bastap engiziledi.
Aqyly ýchaskeniń uzyndyǵy — 645,64 shaqyrym. Onyń ishinde 91 shaqyrymy — qoldanystaǵy, 554,64 shaqyrymy — jańa ýchaske. Ýchaskeniń bastapqy núktesi — 247+700 shaqyrym, sońǵy núktesi — 2151+000 shaqyrym.
Atalǵan ýchaskede ruqsat etilgen jyldamdyq rejımi — saǵatyna 140 shaqyrymnan aspaıdy.
Abonenttik tólemdi kólik quraldary Buqar jyraý, Abaı, Shet, Aqtoǵaı, Moıynqum, Jambyl aýdandarynda, sondaı-aq Balqash jáne Prıozersk qalalarynda tirkelgen paıdalanýshylar rásimdeı alady.
2. Burylbaıtal — Qurty
Bul ýchaskede aqyly rejım 2026 jylǵy 10 shildeden bastap engiziledi.
Aqyly ýchaskeniń uzyndyǵy — 80 shaqyrym. Ýchaskeniń bastapqy núktesi — 1041+000 shaqyrym, sońǵy núktesi — 1121+000 shaqyrym.
Atalǵan ýchaskede ruqsat etilgen jyldamdyq rejımi — saǵatyna 140 shaqyrymnan aspaıdy.
Abonenttik tólemdi kólik quraldary Jambyl jáne Іle aýdandarynda tirkelgen paıdalanýshylar rásimdeı alady.
3. Taldyqorǵan — Óskemen
Bul ýchaskede aqyly rejım 2026 jylǵy 11 shildeden bastap engiziledi.
Aqyly ýchaskeniń uzyndyǵy — 772,955 shaqyrym. Onyń ishinde 32,4 shaqyrymy — I sanatty, 740,55 shaqyrymy — II sanatty jol.
Ýchaskeniń bastapqy núktesi — 287+000 shaqyrym, sońǵy núktesi — 1073+000 shaqyrym.
Jyldamdyq rejımi:
I-b sanatty ýchaskede — saǵatyna 110 shaqyrymnan aspaıdy;
II sanatty ýchaskede — saǵatyna 100 shaqyrymnan aspaıdy.
Abonenttik tólemdi kólik quraldary Eskeldi, Aqsý, Sarqan, Alakól, Úrjar, Aıagóz, Jarma jáne Ulan aýdandarynda tirkelgen paıdalanýshylar rásimdeı alady.
— Abonenttik tólem aqyly ýchaskege irgeles eldi mekenderde tirkelgen jergilikti avtokólik quraldary úshin qarastyrylǵan. Ol bir aıǵa nemese bir jylǵa rásimdeledi jáne kólik quralynyń túri men júk kótergishtigine baılanysty belgilenedi, — delingen habarlamada.
Abonenttik tólemdi kelesi tásilder arqyly rásimdeýge bolady:
— kaztoll.kz saıtyndaǵy jeke kabınet arqyly;
— 1403 tegin baılanys ortalyǵy arqyly;
— aqy alý pýnktterinde;
— klıenttermen jumys isteý ortalyqtarynda.
«QazAvtoJol» ulttyq kompanııasy» AQ júrgizýshilerge aqyly ýchaskeler týraly aqparatpen aldyn ala tanysýdy, kólik quralynyń memlekettik tirkeý nómiriniń durystyǵyn tekserýdi jáne tıisti quqyq bolǵan jaǵdaıda abonenttik tólemdi ýaqytyly rásimdeýdi usynady.
Aıta keteıik, qosymsha suraqtar boıynsha paıdalanýshylar 1403 baılanys ortalyǵyna júgine alady. Qońyraý shalý tegin.
Osyǵan deıin 10 shildeden bastap eldegi tórt aqyly avtojolda ortasha jyldamdyq baqylanatynyn jazdyq.
