Elimizde 10 mlrd teńgege jýyq aqsha aınaldyrǵan dropperler jelisi anyqtaldy
ASTANA. KAZINFORM — Qarjylyq monıtorıng agenttigi onlaın-kazınolarǵa qyzmet kórsetý úshin birneshe eldiń aýmaǵyn qamtıtyn dropperler jelisin qurǵan qylmystyq toptardyń áreketine tosqaýyl qoıdy.
Tergeý barysynda tólemderdi óńdeýmen aınalysqan deldaldardyń Qazaqstan, Ózbekstan jáne Qyrǵyzstan azamattarynyń bank shottaryn paıdalanyp, «drop-fermalar» uıymdastyrǵany anyqtaldy.
— Qazaqstanǵa kelgen shetel azamattaryna jeke sáıkestendirý nómirleri (JSN) berilip, olardyń atyna SIM-kartalar men bank shottary ashylǵan. Keıin bank qosymshalaryna kirýge ruqsaty bar uıaly telefondar osy shottar arqyly aqsha aınalymyn basqaratyn adamdarǵa berilgen. Aqsha aınalymyn basqarý úshin oıynshylardan tólem qabyldaýǵa, olardy avtomatty túrde anyqtaýǵa jáne utystardy tóleýge múmkindik beretin P2P platformasy paıdalanylǵan. Qylmystyq top músheleri ózara esep aıyrysý úshin krıptovalıýtany da qoldanǵan, — delingen habarlamada.
Túrkistan oblysy men Almaty qalasynda Qazaqstan bankteriniń 89 kartasyn paıdalanǵan. Ózbekstannyń úsh azamaty ustaldy. Olardan bank shottaryn basqarýǵa arnalǵan 20 telefon tárkilendi. Atalǵan kartalar arqyly júrgizilgen operatsııalardyń jalpy kólemi 500 mln teńgege jetken.
Jambyl oblysynda da birneshe eldiń aýmaǵynda áreket etken taǵy bir qylmystyq toptyń joly kesildi. Onyń músheleri Qyrǵyzstan men Ózbekstan azamattaryn, sonyń ishinde kámeletke tolmaǵandardy tartyp, Taraz ben Almaty qalalarynda ózge adamdardyń bank shottary arqyly aqsha aınalymyn júrgizetin jeli qurǵan.
Tintý barysynda 180 bank kartasy, 15 telefon, 50 myń AQSh dollary, 27 myń USDT, tórt avtokólik, qarý-jaraq, oq-dáriler jáne 26 SIM-karta tárkilendi. Bank kartalaryna túsken aqshanyń jalpy kólemi 9,8 mlrd teńgeden asqan.
Sot bes kúdiktini qamaýǵa alýǵa sanktsııa berdi.
Tergeý jalǵasyp jatyr. Ózge málimetter Qazaqstan Respýblıkasy Qylmystyq-protsestik kodeksiniń 201-babyna sáıkes jarııa etilmeıdi.
Eske salaıyq, buǵan deıin aqtóbelik tergeýshi dropperlerdiń shemasyn túsindirgen edi.
