Elimizde 10 myńnan astam lager men 512 shatyrly kempıng ashylady
ASTANA. KAZINFORM – Elimizde bıylǵy jazda 10 myńnan astam mektep janyndaǵy lager men 512 shatyrly kempıng ashylady. Bul týraly Úkimettiń baspasóz qyzmeti habarlady.
Oqý-aǵartý mınıstrligi jazǵy naýqanǵa daıyndyqty bastady. 2025 jyldyń jazǵy kezeńinde saýyqtyrý, demalys jáne jumyspen qamtýdyń túrli baǵdarlamalarymen 3,1 mln balany qamtý josparlanyp otyr. Onyń ishinde 500 myńnan astamy áleýmettik osal sanattaǵy bala. «Qazaqstan halqyna» qorynyń qoldaýymen 10 myń bala tegin demalýǵa múmkindik alady.
Barlyq uıymdastyrýshylyq másele 9 memlekettik organnyń birlesken jospary sheńberinde pysyqtalyp jatyr. Osy maqsatta respýblıkalyq jáne óńirlik shtabtar quryldy. Bıylǵy jazda jumysty bastaýdy josparlap otyrǵan demalys ortalyqtarynyń tizimi daıyndaldy.
Qaýipsiz jáne belsendi jazǵy demalys mádenıetin qalyptastyrý úshin jadynamalar, nusqaýlyqtar men gaıdbýktar daıyndalyp, tartylady. Qaýipsizdikti qamtamasyz etýge erekshe nazar aýdarylady.
Sanıtarlyq normalardyń saqtalýyna, azyq-túlik qaýipsizdigine, sondaı-aq sýda, ormanda jáne sport obektilerinde saqtyq sharalaryna baqylaý kúsheıtildi.
Bıyl barlyǵy 16 jyl boıy jumys isteý, 188 maýsymdyq, 10 myńnan astam tamaqtanatyn jáne tamaqtanbaıtyn mektep janyndaǵy lagerdi, sondaı-aq 512 shatyrly jáne kıiz úı lagerlerin kezeń-kezeńimen ashý josparlanyp otyr.
Aıta keteıik, byltyr jazǵy demalyspen 2 939 028 bala qamtyldy.