Elimizde 1 shaqyrym avtojol salýǵa qansha qarajat ketedi

ASTANA. KAZINFORM – «QazAvtoJol» UK» AQ elimizde 1 shaqyrym jol salý úshin qansha qarajat jumsalatynyn málimdedi.

«Qazirgi smetalyq-normatıvtik bazaǵa sáıkes, halyqaralyq jáne respýblıkalyq mańyzy bar І-b tehnıkalyq sanattaǵy (qozǵalysqa arnalǵan 4 jolaǵy bar) 1 shaqyrym joldy salý jáne jańǵyrtý quny ortasha eseppen 1,5-2 mlrd teńgeni, ІІ tehnıkalyq sanattaǵy (qozǵalysqa arnalǵan 2 jolaǵy bar) 1 shaqyrym joldy salý jáne jańǵyrtý quny — orta eseppen1-1,2 mlrd teńge» delingen atalǵan kompanııanyń agenttik saýalyna bergen jaýabynda.

«QazAvtoJol» usynǵan derekke qaraǵanda, Eýropa elderinde І tehnıkalyq sanattaǵy avtojoldyń 1 shaqyrymynyń quny 3,5 mlrd teńgeden (Polshada — 3,5 mlrd teńge, Germanııada — 3,8 mlrd teńge, Avstrııada — 5,5 mlrd teńge) bastalady.

Bul Qazaqstanda jumsalatyn qarjydan 2 ese kóp.

Taıaý shetelderde 1 shaqyrym joldyń quny 3 mlrd teńgeden (Qytaıda — 12 mlrd teńge, Reseıde — 3 mlrd teńge) bastalyp, qymbattaı beredi.

«Sonymen qatar 1 shaqyrym joldyń quny joba júzege asyrylatyn aýmaqtyq jerge (máselen, respýblıkanyń batys óńirlerinde ınertti materıal joq bolǵandyqtan ony tasymaldaýǵa týra keledi. Sondyqtan jol quny da kóteriledi), jasandy qurylystar sanyna, demalys alańdaryna jáne basqalaryna baılanysty. Buǵan qosa, avtojoldyń qun kórsetkishteri álemdik ekonomıkalyq kórsetkishterge oraı materıaldyq resýrstardyń qymbattaýy men eńbek shyǵystaryna baılanysty ekendigin atap ótkimiz keledi. Máselen, ınflıatsııa jyldyń ár jańa toqsanynda ósip otyrady» dep túsindiredi kompanııadan.