Elimizde 1 mln gektardan astam aýmaqta ormandy qalpyna keltirý josparlanyp otyr
ASTANA. KAZINFORM - Qazaqstanda orman-klımattyq jobalardy damytýǵa, ormandy qalpyna keltirýge jáne kómirtekti qarjylandyrý salasyna ınvestıtsııalar tartýǵa jaǵdaı jasaıtyn tıisti zańnamalyq túzetýler qabyldandy, dep habarlaıdy QR Ekologııa mınıstrliginiń baspasóz qyzmeti.
Sonymen qatar, Óńirlik ekologııalyq sammıt (RES) aıasynda «Ortalyq Azııanyń jasyl qalqany» bastamasy boıynsha qararǵa qol qoıylyp, Qazaqstanda 1 044 500 gektar aýmaqta ormandardy qalpyna keltirý jáne jasyl ekpelerdi ulǵaıtý kózdelgen.
Osy baǵytta Ekologııa jáne tabıǵı resýrstar mınıstrliginde First Carbon Group Ltd. kompanııasynyń ókilderimen kezdesý ótti.
Kompanııa halyqaralyq ınvestıtsııalar men kómirtek naryǵynyń tetikterin tarta otyryp, 100 myń gektarǵa deıin orman ekpelerin qurý jónindegi bastamasyn tanystyrdy.
-Bul kezdesý orman-klımattyq jobalardy áleýetti ınvestorlarǵa tanystyrý baǵytyndaǵy alǵashqy qadamdardyń biri boldy. Mınıstrlik osy baǵyttaǵy jumysty jalǵastyryp, otandyq jáne halyqaralyq ınvestıtsııalardy tartýdy kózdeıdi,-delingen habarlamada.
Osyǵan deıin Qazaqstannyń munaı-gaz hımııasyna 15 mlrd dollar ınvestıtsııa tartýdy kózdep otyrǵany týraly jazdyq.
