Elimizde 1 mıllıonǵa jýyq adam baspana kezeginde tur
ASTANA. KAZINFORM — Qazaqstanda 988 myńnan astam azamat turǵyn úı kezeginde tur. Onyń 459 myńǵa jýyǵy áleýmettik osal toptarǵa jatady. Bul týraly OKQ ótken baspasóz májilisinde QR Ónerkásip jáne qurylys mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov málimdedi.
Onyń aıtýynsha, turǵyn úıge muqtaj azamattarǵa birneshe baǵyt boıynsha memlekettik qoldaý kórsetiledi. Olarǵa jalǵa beriletin baspana, 2 jáne 5 paıyzdyq jeńildetilgen ıpoteka, turǵyn úı sertıfıkattary jáne páter jaldaý aqysynyń bir bóligin sýbsıdııalaý kiredi.
— Bıyl turǵyn úıge muqtaj azamattardy memlekettik qoldaý aıasynda baspanamen qamtamasyz etý úshin 155,5 mıllıard teńgege 12,6 myń kredıttik turǵyn úı salý jáne satyp alý josparlanyp otyr. Sonymen qosa ákimdikterge oblıgatsııalyq qaryz berý arqyly 269 mıllıard teńgege 13,5 myń jalǵa beriletin páter salý jáne satyp alý jumystary júrgizilip jatyr. Oǵan qosa jalpy sıpattaǵy transfertter esebinen 71,9 mıllıard teńgege 3,5 myń jalǵa beriletin turǵyn úı satyp alý qarastyryldy, — dedi spıker.
Vedomstvo ókiliniń dereginshe, jalpy bıyl Qazaqstanda 20,4 mıllıon sharshy metr turǵyn úı nemese 188 myń páter paıdalanýǵa beriledi dep josparlanǵan. Al alǵashqy segiz aıda 11,3 mıllıon sharshy metr turǵyn úı, ıaǵnı 105,9 myń páter paıdalanýǵa berilgen. Bul — jyldyq jospardyń 55,3 paıyzy.
Aıta keteıik, buǵan deıin Qazaqstanda turǵyn úıge muqtaj azamattarǵa 2 jáne 5 paıyzdyq jeńildetilgen ıpoteka beriletini jóninde jazdyq. Bıyl osy baǵytta 12,6 myń qaryz berý josparlanǵan. Oǵan 175,1 mıllıard teńge qarastyrylǵan.
