Elimizdi Altyn Ordanyń quqyqtyq murageri retinde tanytatyn halyqaralyq sımpozıým ótedi
ASTANA. KAZINFORM — 19-20 mamyrda «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıým ótedi. Bul týraly Mádenıet jáne aqparat mınıstrliginen málim etti.
— Memleket basshysynyń Ulttyq quryltaıdyń V otyrysynda berilgen tapsyrmasyn oryndaý maqsatynda 2026 jylǵy 19-20 mamyr aralyǵynda Astana qalasynda «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıým ótkizý josparlanǵan. Sımpozıýmdy ótkizý Qazaqstannyń ulttyq biregeıligin nyǵaıtýǵa, elimizdi Altyn Ordanyń quqyqtyq muragerleriniń biri retinde tanytýǵa yqpal etedi. Sonymen qatar Uly Dala dáýirin zertteýdegi halyqaralyq ǵylymı bedelin arttyrady, — dedi mınıstrlikten agenttiktiń resmı saýalyna oraı.
Vedomstvo málimetinshe, ǵylymı jıynǵa barlyǵy 350-den asa delegat qatysady dep josparlanǵan.
— Olardyń qatarynda halyqaralyq uıym ókilderi, bedeldi sheteldik ǵalymdar, qazaqstandyq tarıhshy-ǵalymdar bar, — dep naqtylady Mádenıet mınıstrliginen.
Taıaýda batysqazaqstandyq ǵalymdar Altyn Orda dáýirine jatatyn jańa arheologııalyq nysandardy tapqan edi.
