Elimiz sporttyń nysana kózdeý túrlerin damytýǵa burynnan erekshe mán berip keledi — Prezıdent

ASTANA. KAZINFORM — Memleket basshysy Halyqaralyq nysana kózdeý federatsııasy (ISSF) jáne Nysana kózdeýden Azııa konfederatsııasynyń (ASC) jetekshilerin qabyldady. Bul týraly Aqordanyń baspasóz qyzmeti habarlady. 

Qasym-Jomart Toqaev Halyqaralyq nysana kózdeý federatsııasynyń prezıdenti Lýchano Rossımen jáne Nysana kózdeýden Azııa konfederatsııasynyń prezıdenti sheıh Salman Sabah ál-Salem as-Sabahpen kezdesýde yntymaqtastyq perspektıvasyn talqylady.

Memleket basshysy halyqaralyq federatsııalardyń atqaratyn mıssııasyna jáne uıym basshylarynyń atalǵan sport túrin tanymal etýge qosqan jeke úlesine joǵary baǵa berdi.

Qasym-Jomart Toqaev elimiz sporttyń nysana kózdeý túrlerin damytýǵa burynnan erekshe mán beretinin atap ótti.

Prezıdent aldaǵy ýaqytta nysana kózdeý jáne stend atý sportyn damytýǵa daıyn ekenin jetkizip, sheteldik seriktestermen yqpaldastyqty keńeıtý úshin qajetti sharalar qabyldaıtynyn aıtty.

ISSF pen ASC jetekshileri osy sport túrin damytýǵa aıryqsha nazar aýdarǵany úshin Qazaqstan Prezıdentine rızashylyqtaryn bildirdi.

Áńgimelesý barysynda elimizdegi nysana kózdeý keshenderiniń materıaldyq-tehnıkalyq bazasyn jańǵyrtý, sportshylardy daıarlaýdyń zamanaýı ádistemesin engizý, sondaı-aq jastarmen, balalar jáne jasóspirimderdiń sport klýbtarymen jumys baǵdarlamasyn keńeıtý máseleleri qarastyryldy.

Memleket basshysy Lýchano Rossı men Salman Sabah ál-Salem as-Sabahty ІІ dárejeli «Dostyq» ordenimen marapattady.

Aıta ketelik Memleket basshysy Úndistan Premer-mınıstri Narendra Modıdi quttyqtaǵan edi.