Elimiz shveıtsarııalyq vagondardyń bireýin 1,18 mlrd teńgeden satyp almaq

ASTANA. KAZINFORM – Elimiz shveıtsarııalyq platskart vagondardyń bireýin 1,18 mlrd teńgeden satyp almaq. Bul týraly Májilistegi eldiń kólik-logıstıkalyq áleýetin damytýǵa arnalǵan Úkimet saǵatynda depýtat Nurtaı Sabılıanov aıtty.

- Búgingi kúni jolaýshy vagondarynyń parkine baılanysty úlken másele bar. Qazir 2 667 birlik vagon bar eken. Onyń ishinde: 1012 birlik, ıaǵnı vagondardyń 39 paıyzy 28 jyldan astam ýaqyt boıy paıdalanylyp kele jatqan eski. Ózderińiz biletindeı, 2012-2022 jyldar aralyǵynda «Talgo» shyǵarǵan 676 jolaýshy vagony satyp alyndy. Onyń baǵasy 350 mln teńgeden 650 mln teńge aralyǵynda boldy. Qazir bul zaýyt jabyldy, - dedi Májilis depýtaty.

Onyń atap ótýinshe, sodan keıin «ZIKSTO» jaýapkershiligi shekteýli seriktestiginen 2023-2024 jyldary 750 mln teńgeden 850 mln teńgege deıingi baǵamen 150 birlik jolaýshy vagony satyp alyndy.

- Qazirgi ýaqytta «Shtadler Qazaqstan» jaýapkershiligi shekteýli seriktestigi shveıtsarııalyq kompanııasymen 557 vagon satyp alý boıynsha kelissózder júrgizilip jatyr. Platskart vagon birliginiń baǵasy – 1,18 mlrd teńge. Vagondar máselesin halyq jıi kóteredi. Sanıtarııalyq jaǵdaıy joq. Sondyqtan, ulttyq tasymaldaýshy jolaýshylardy jańa jaıly vagondarmen qamtamasyz etýge tıis, - dedi Nurtaı Sabılıanov.

Aıta keteıik, Májilis depýtaty temirjol kóligimen tasymaldy tejeıtin faktorlardy atady.