Elimiz oń baǵytta damyp keledi – saýalnama

ASTANA. KAZINFORM – Qoǵamdyq saıasat ınstıtýtynyń zertteý nátıjesi boıynsha respondentterdiń 70%-dan astamy elimiz durys baǵytta damyp keledi dep esepteıdi. 

Atalǵan pikirmen aýyl turǵyndarynyń 80,7%, 24 jasqa deıingi jastardyń 78,9% jáne áıelderdiń 72,2% kelisip otyr. Halyqtyń qazirgi saıası jáne áleýmettik-ekonomıkalyq jaǵdaıdy baǵalaýynda birshama oń qalyp baıqalady, ıaǵnı 76,5% jáne 67%.

Atalǵan nátıje elimizde júrgizilip jatqan reformalardyń oń qabyldanýymen baılanystyrylady. Qoǵamdyq-saıası salada azamattar aýyl ákimderin tikeleı saılaý múmkindigine ıe boldy, saılaý júıesi aıqyndala tústi, sol sııaqty Konstıtýtsııalyq sot qaıta quryldy, genderlik teńdik bastamalary áıelderge saıasat pen qoǵamdyq ómirge belsendi qatysýǵa jańa múmkindikter ashty.

Áleýmettik-ekonomıkalyq saladaǵy ózgerister bıýdjet salasy qyzmetkerleriniń tabysyn aıtarlyqtaı arttyrýǵa, aýqymdy qoldaý baǵdarlamasyn iske qosýǵa, jer resýrstaryna ádil qoljetimdilikti qamtamasyz etýge, qaýipti jáne zııandy óndiristerde eńbek etetin jumysshylar úshin zeınetke shyǵý jasyn tómendetýge múmkindik berdi.

Jalpy, saýalnama nátıjesi boıynsha respondentterdiń 89% kóńil-kúıin oń sıpattaǵan. Oń kózqaras kóbine 18-35 jas aralyǵyndaǵy jastar, boıdaqtar men otbasyly azamattar jáne joǵary bilimdi respondentterge tán.

Qazaqstan túbegeıli ózgerister men tereń reformalar jolyna tústi: Parlament quzyreti keńeıdi, azamattar ákimderdi saılaı alatyn boldy. Elimizdiń qoǵamdyq-saıası jáne basqa da salalarynda taǵy qandaı ózgerister bolyp jatyr - Kazinform tilshisi taldaý jasaǵan edi.