Elimiz kómir óndirýden on iri eldiń qataryna kiredi

ASTANA. KAZINFORM – Aqordada ótken saltanatty jıynda Prezıdent Qasym-Jomart Toqaev kómirsýtegi dúnıe júziniń energetıka naryǵynda, sáıkesinshe, Qazaqstannyń energetıka salasynda burynǵydaı basty rólge ıe bola beretinin aıtty.

Prezıdenttiń pikirinshe, álemdegi munaı-gaz salasy kóptegen memleket pen belgili sarapshylardyń jiti baqylaýynda. Salanyń keleshegi onyń jahan ekonomıkasynyń damý perspektıvasyna yqpal etýi turǵysynan talqylanyp jatyr.

– Meniń paıymdaýymsha, kómirsýtegi dúnıe júziniń energetıka naryǵynda, sáıkesinshe, Qazaqstannyń energetıka salasynda burynǵydaı basty rólge ıe bola beredi. Birqatar eldiń, sonyń ishinde eýropalyq memleketterdiń tájirıbesi kórsetkendeı, balama qýat kózi qajettilikti tolyq óteı almaıdy. Budan bólek, ónerkásipte, sonyń ishinde elektr stansalarynyń qurylysynda kómirdi zalalsyzdandyratyn ozyq tehnologııany paıdalanýǵa basa mán berý qajet. Qazaqstannyń energııa balansynda kómirdiń úlesi 70 paıyzǵa jýyq ekeni málim. Elimiz kómir óndirýden on iri eldiń qataryna kiredi. Bul artyqshylyqtan bas tartpaǵan jón. Kerisinshe, ony tıimdi paıdalaný kerek, – dedi Memleket basshysy.

Aıta keteıik, Memleket basshysy munaı-gaz salasynyń qyzmetkerlerin kásibı merekesimen quttyqtady.