Elimiz kómir deldaldarymen qalaı kúresip jatyr
ASTANA. KAZINFORM – Ónerkásip jáne qurylys mınıstrligi kómirdi zańsyz satatyn deldaldarmen qalaı kúresip jatyr? Bul saýaldy Ónerkásip komıtetiniń kómir ónerkásibi basqarmasynyń basshysy Janat Igisinovke qoıǵan edik.
- Deldaldarmen kúresý úshin arnaıy Úkimettiń qaýlysy bar. Biraq aralarynda tapqyr, qý deldaldar da bar. Olar kómirdi temir jol arqyly syrtqa shyǵardy, oǵan tosqaýyl qoıý úshin Úkimettiń qaýlysy shyqty. Ol boıynsha tek qana jer qoınaýymen aınalysatyndar, ıaǵnı kómir óndirýshilerge lıtsenzııa beriledi. Olar qansha tonna kómir eksporttaıtynyn jáne qaı elge shyǵaratynyn aıtady, sol kólemde tıisinshe lıtsenzııa beriledi, - dep jaýap berdi Janat Igisinov elordada ótken VI kómir ónerkásibi forýmy aıasynda agenttik tilshisine.
Onyń aıtýynsha, shekaradan tek lıtsenzııasy bar kómir tasýshylardy ǵana ótkizedi.
- Sondyqtan deldaldarǵa tolyq tosqaýyl qoıyldy deýge bolady, - dep qysqa qaıyrdy mınıstrlik ókili.
Aıta keteıik, búgin Astanada VI kómir ónerkásibi forýmy ótti.
Buǵan deıin habarlaǵanymyzdaı, búginde elimizde 33 mlrd 600 mln tonna kómir qory bar. Qazaqstan kómir qory boıynsha álemde alǵashqy 10 eldiń qataryna kiredi.