Elimiz ınvestıtsııa tartý kórsetkishi boıynsha Ortalyq Azııadaǵy kóshbasshylyǵyn saqtaýdy kózdeıdi — Memleket basshysy
ASTANA. KAZINFORM — QR Prezıdenti janyndaǵy sheteldik ınvestorlar keńesiniń 38-shi plenarlyq otyrysynda Qasym-Jomart Toqaev elimiz udaıy ornyqty damý baǵdaryn ustanyp kele jatqanyn málimdedi.
Onyń sózinshe, eń áýelgi mindet — ekonomıkany jáne saıası baǵytty jańa talaptarǵa der kezinde beıimdeý.
— Syrtqy konıýnktýranyń qolaısyzdyǵyna qaramastan, Qazaqstan ekonomıkasy byltyr 6,5 paıyzǵa ósti. Eldegi ishki jalpy ónim kólemi 300 mıllıard dollarlyq mejeden asty. Investıtsııa tartý kórsetkishi boıynsha elimiz Ortalyq Azııadaǵy kóshbasshylyǵyn saqtaýdy kózdeıdi. Tikeleı sheteldik ınvestıtsııanyń jıyntyq kólemi 150 mıllıard dollardan asyp, aımaqqa quıylǵan barlyq qarjynyń shamamen 70 paıyzyn qurady. Osy ekonomıkalyq tabystarǵa negizinen saıası turaqtylyqtyń arqasynda qol jetkizip otyrmyz. Jalpyulttyq tarıhı referendýmnyń qorytyndysy boıynsha Qazaqstan Respýblıkasynyń jańa Konstıtýtsııasyn qabyldadyq, bul qujat qazirdiń ózinde halyqtyq Konstıtýtsııa retinde tanyldy. Negizgi zańnyń búgingi otyrys qarsańynda kúshine enýi sımvoldyq mánge ıe. Jańartylǵan konstıtýtsııalyq normalar ınvestorlar quqyǵyn barynsha joǵary deńgeıde qorǵaıdy, — dedi Memleket basshysy.
Sonymen qatar, ol halyqaralyq bıznes úshin tartymdy zamanaýı ınstıtýtsıonaldyq orta qalyptasqanyna nazar aýdardy.
Odan bólek, ınvestıtsııalyq rásimderdi jeńildetý úshin «bir tereze» qaǵıdatyna saı qyzmet kórsetetin Ulttyq tsıfrlyq ınvestıtsııalyq platforma iske qosyldy.
— Investıtsııalyq shtab qyzmeti jedel sheshim qabyldaýǵa jáne ınvestorlarǵa memleket tarapynan jan-jaqty qoldaý kórsetýge baǵyttalǵan. Bızneske ınstıtýtsıonaldyq kepildiktermen birge uzaqmerzimdi naqty yntalandyrý tetikterin usynamyz. Búginde sheteldik kásipkerler salyqtyq jeńildikter men ońaılatylǵan kóshi-qon rásimderi qarastyrylǵan Altyn visa baǵdarlamasynyń artyqshylyǵyn paıdalana alady. Degenmen biz munymen ǵana shektelmeımiz. Aldymyzda aýqymdy jumys bar, — dedi Qasym-Jomart Toqaev.
Aıta keteıik, buǵan deıin Citigroup ókili Qazaqstan álemdegi tsıfrlyq ınnovatsııanyń keleshegin qalyptastyryp jatqanyn málimdegenin jazǵanbyz.
