Elimiz eksporttyq saıasatyn kúsheıtedi
ASTANA. KAZINFORM – Qazaqstan Birikken Arab Ámirlikterimen kórsetiletin qyzmetter men ınvestıtsııalardyń erkin saýdasy týraly kelisim jasaspaq.
Bul týraly Saýda jáne ıntegratsııa mınıstrliginiń keńeıtilgen alqa májilisinde vedomstvo basshysy Arman Shaqqalıev aıtty.
Onyń atap ótýinshe, mınıstrliktiń aldyna eksportty ilgeriletý úshin qajetti quraldardy shoǵyrlandyra otyra, eksportty qoldaýdyń biryńǵaı terezesin qurý mindeti júktelgen.
- Ótken jyldyń qańtar aıynda saqtandyrý jáne qarjylyq qoldaý sharalarynyń keń spektrin júzege asyrýǵa baǵyttalǵan «Eksporttyq nesıe agenttigi týraly» Zań qabyldandy. Osy baǵytta Qazaqstannyń eksporttyq nesıe agenttigi qoldaý quraldarynyń qataryn keńeıtti. Sýbsıdııalaýǵa balama retinde kepildik berý, eksport aldyndaǵy jáne saýda qarjylandyrý quraldary engizildi. Kólik dálizderiniń damýyn eskere otyryp, Qytaı, Eýrazııalyq ekonomıkalyq odaq, Ortalyq Azııa, Eýropalyq Odaq jáne Taıaý Shyǵys elderi sııaqty naryqtary anyqtaldy, - dedi Arman Shaqqalıev.
Sondaı-aq, ol syrtqy saýda baılanystaryn keńeıtý maqsatynda Qazaqstan men Sıngapýr arasyndaǵy kórsetiletin qyzmetter men ınvestıtsııalardyń erkin saýdasy týraly kelisim ratıfıkatsııalanǵanyn aıtty.
- Buǵan qosa tolyq formatty kelisim Birikken Arab Ámirlikterimen júrgizilip jatyr. Iran jáne Eýrazııalyq ekonomıkalyq odaq aıasynda taýarlardyń erkin saýdasy týraly tolyq formatty kelisimdi ratıfıkatsııalaý aıaqtaldy, - dedi mınıstr.
Osyǵan deıin Arman Shaqqalıev saýda mınıstrliginiń basym mindetterin ataǵany týraly jazdyq.