Elimiz dárilik zattardyń ımportyna batyp barady - depýtat
ASTANA. KAZINFORM — Dárilik zattar men medıtsınalyq zattardyń otandyq óndirisiniń úlesin 50 paıyzǵa jetkizý mindeti oryndalmaýy múmkin. Bul týraly Parlament Májilisiniń jalpy otyrysynda depýtat Ashat Aımaǵambetov aıtty.
- Otandyq farmóndiris jáne ǵylymǵa toqtalsaq, mıllıardtar ıllıýzııaǵa ketip jatqan joq pa? Memleket basshysy 2025 jylǵa qaraı dárilik zattar men medıtsınalyq buıymdardyń otandyq óndirisiniń úlesin 50 paıyzǵa deıin jetkizý mindetin qoıdy. 2024 jyly ol tek 15 paıyzdy qurady. Biz ımport teńizine batyp baramyz. Dárilerdiń 84 paıyzyn shetelden ákelemiz. 89 otandyq óndirýshiniń tek 2 paıyzy dári shyǵarady, al qalǵandary maska nemese shprıts sııaqty medıtsınalyq zattardy óndiredi eken. Osyndaı jumyspen, jyl sońyna qaraı qoıylǵan maqsatqa jetý múmkin emes, - dedi A. Aımaǵambetov palata otyrysynda dári-dármekpen qamtamasyz etý júıesine júrgizilgen memlekettik aýdıt nátıjesin talqylaý kezinde.
Onyń aıtýynsha, otandyq óndirýshilerdi qoldaýǵa qomaqty aqsha jumsalyp jatyr. Bul mıllıardtaǵan sýbsıdııalar, jeńildikpen nesıe berý, kedendik preferentsııalar, salyqtan bosatý, sondaı-aq uzaq merzimdik tutyný týraly sharttar qamtylǵan.
- Osyndaı qoldaý kórsete otyryp, biz qandaı paıda kórip otyrmyz? Oǵan qosa, bul ónimderde otandyq ekonomıka úlesi de az, qaǵaz da, shyny da kóbinese syrttan keledi degen aqparat bar. Sonda mıllıardtardtaǵan sýbsıdııalar men qoldaýymyz jasandy, ıllıýzııalyq óndiriske ketip jatqan joq pa? Áli kúnge deıin lokalızatsııa deńgeıi belgisiz, qandaı sýbstantsııa shekara arqyly kirip jatqany da bizge túsiniksiz. Investıtsııalyq kelisimsharttar boıynsha da suraq kóp. Olardy belgili bir ýaqyt ótken saıyn jańartyp, ınvestorlardyń mindettemelerin naqty kórsetý kerek, - dedi depýtat.
Budan buryn habarlanǵandaı, QR Joǵary aýdıtorlyq palatasynyń tóraǵasy Álıhan Smaıylov Qazaqstanda azamattardy dári-dármekpen qamtamasyz etý júıesine júrgizilgen memlekettik aýdıt nátıjesin jarııalady.
Sonymen qatar Májilisiniń jalpy otyrysynda depýtat Ashat Aımaǵambetov Qazaqstanda dárini tirkeý úshin óte kúrdeli bıýrokratııalyq rásimderden ótý kerek ekenin aıtyp, osy salany synǵa aldy.