Elimiz boıynsha salynyp jatqan 124 úıdiń qurylysy problemaǵa aınalýy múmkin

ASTANA. KAZINFORM — Elimiz boıynsha salynyp jatqan 124 úıdiń qurylysy problemaǵa aınalýy múmkin. Bul týraly Ónerkásip jáne qurylys vıtse-mınıstri Qýandyq Qajkenov aıtty. 

— Búginde elimiz boıynsha qurylysynda problema bar 44 nysan bar. Onyń úsheýiniń qurylysy aıaqtaldy, taǵy ekeýiniń qurylysy jyl sońyna deıin aıaqtalady. Munan bólek, sary aımaqta 124 nysan bar, olar da problemaly bolýy múmkin. Degenmen, biz olardy ákimdiktermen birge baqylaýda ustap otyrmyz, — dedi vıtse-mınıstr Senattyń otyrysynan keıin BAQ ókilderiniń saýalyna oraı.

Onyń aıtýynsha, Qurylys kodeksi aıasynda adal emes qurylys kompanııalarynyń tizilimi bolady. Ol 2026 jyldyń 1 shildesinen bastap kúshine enedi.

— Qurylys kompanııalary qurylysty zańsyz bastaǵanda nemese alaıaqtyq is-áreketke barsa, zańdy oraǵytyp úleskerlerdiń qarajatyn tartsa, onda olar atalǵan tizilimge enedi. Sodan keıin olarǵa 3 jyl boıy kepildik jáne basqalary berilmeıdi. Qara tizilimde turady. Ony tizilimnen tek sot tártibimen ǵana alyp tastaýǵa bolady, — dedi Qýandyq Qajkenov.

Aıta keteıik, búgin Senat Qurylys kodeksiniń jáne ilespe qujattyń jekelegen baptaryn maquldamaı jańa normalarmen tolyqtyrý arqyly Májiliske qaıtardy.