Elimiz boıynsha 337 medıtsınalyq-sanıtarııalyq alǵashqy kómek nysany jóndeýden ótedi
ASTANA. KAZINFORM – Búgingi tańda ártúrli óńirlerdegi 337 medıtsınalyq-sanıtarııalyq alǵashqy kómek (MSAK) nysanynda qurylys jumystary bastaldy. Memleket basshysynyń bastamasymen «Aýyldyq densaýlyq saqtaýdy jańǵyrtý» ulttyq jobasynyń iske asyrylý barysy týraly Densaýlyq saqtaý mınıstri Aqmaral Álnazarova Úkimet otyrysynda aıtty.
655 nysan úshin jobalaý-smetalyq qujattamany ázirleý jáne baılanystyrý jumystary tolyǵymen aıaqtaldy, onyń ishinde 102 nysannyń qurylysy aıaqtaldy.
«Óńirlik ákimdikter jergilikti bıýdjetterden 551 nysandy (99,6%) birlesip qarjylandyrýdy kózdedi. 441 nysan boıynsha qurylys sharttary jasalyp, 107 nysan boıynsha konkýrstyq rásimder júrgizilip jatyr», — delingen habarlamada.
355 nysannyń qurylysyna respýblıkalyq bıýdjet jáne Úkimet rezerviniń esebinen qarjylandyrý kózdelgen. Qarjy mınıstrligimen birlesip, 194 nysannyń qurylysyn bastaý úshin Úkimettiń rezervinen qosymsha qarajat bólý (32-35%) josparlanǵan. Osylaısha, barlyq nysandardyń qurylysyn bastaýǵa 30% kóleminde qarjylandyrý qamtamasyz etiledi.
Ulttyq jobanyń ekinshi mindetiniń sheńberinde iske asyrý merzimi 2023-2025 jyldarǵa eseptelgen 32 aýdandyq aýrýhanany jańǵyrtý jumystary jalǵasýda. 2023 jyly kúrdeli jóndeýge respýblıkalyq bıýdjetten 3,9 mlrd. teńge bólindi, al aǵymdaǵy jyly 7,6 mlrd.teńgege qosymsha ótinishpen 9,7 mlrd. teńge kózdeldi.
Búgingi tańda 2 aýdandyq aýrýhanaǵa kúrdeli jóndeý jumystary aıaqtaldy, 10 nysan boıynsha qurylys jumystary júrgizilip jatsa, 5 nysan konkýrstyq rásimderdi ótkizý satysynda, 5 joba saraptamadan ótkizilip jatyr, 8 joba boıynsha jobalaý-smetalyq qujattama ázirlenip jatyr.
«Ulttyq jobanyń sheńberinde densaýlyq saqtaý nysandaryn medıtsınalyq kadrlarmen qamtamasyz etý úshin kadrlarǵa jalpy qajettilik 1100 medıtsına qyzmetkerin qurady. 2023-2024 jyldary 150 nysanda 656 medıtsına qyzmetkeri jumysqa ornalastyryldy», — dedi mınıstr A.Álnazarova.
Mamandardyń yntasyn arttyrý jáne olardy aýylda ustap qalý úshin memlekettik qoldaý sharalary kózdelgen. Densaýlyq saqtaý mınıstrligi óńirlik ákimdikterdi jas mamandardy monıtorıngileý jáne qoldaý jónindegi jumysty kúsheıtýge, sondaı-aq jergilikti bıýdjet qarajatynyń esebinen áleýmettik qoldaý sharalaryn qabyldaýǵa shaqyrady.
