Elimiz bıtkoın maınıngi salasynda álemdegi jetekshi on eldiń qataryna endi
ASTANA. KAZINFORM — Búgin Úkimet otyrysynda Premer-mınıstr Oljas Bektenov maınıng ortalyqtarynyń qyzmetin qamtamasyz etý úshin gaz jáne kómir generatsııasyn paıdalaný tetigin pysyqtaýdy tapsyrdy.
- Qazaqstanda tsıfrlyq aktıvterdi damytý úshin krıptovalıýtalardyń ónerkásiptik maınıngi júzege asyrylýda. Halyqaralyq zertteý derekterine sáıkes, 2025 jyldyń qorytyndysy boıynsha elimiz jahandyq bıtkoın maınıngi salasyna qatysý úlesi boıynsha álemdegi jetekshi on eldiń qataryna endi. Qazirgi tańda maınıngtik qýattardyń kólemin arttyryp qana qoımaı, basqa baǵyttarǵa da nazar aýdarǵan jón. Atap aıtqanda, bul saladaǵy memlekettik saıasat energııa tutyný deńgeıin baqylaýdy, salyq salýdyń ashyqtyǵyn jáne salanyń álemdik tsıfrlyq ekonomıkaǵa ıntegratsılanýyn qamtamasyz etetin sapaly jumys modelin qalyptastyrýǵa baǵyttalýy qajet, - dedi O. Bektenov.
Osy oraıda Úkimet basshysy Jasandy ıntellekt mınıstrligine Blokcheın jáne maınıng qaýymdastyǵymen, sondaı-aq múddeli memlekettik organdarmen birlesip, salany odan ári damytý jóninde qosymsha sharalar ázirleýdi tapsyrdy.
- Bırjany, tsıfrlyq quraldardy, tokenızatsııany, aktıvterdi saqtaý tetikterin jáne tólem sheshimderin qamtıtyn tolyqqandy tsıfrlyq maınıng ındýstrııasyn qalyptastyrý qajet. Energetıka mınıstrligi Jasandy ıntellekt mınıstrligimen birlesip, maınıng ortalyqtarynyń qyzmetin qamtamasyz etý úshin gaz jáne kómir generatsııasyn paıdalaný tetigin pysyqtasyn, - dedi Premer-mınıstr.
Budan buryn habarlanǵandaı, elimizde 76 lıtsenzııalanǵan maıner bar.
