Elimiz balalardyń quqyǵyn qorǵaýda jahandyq TOP-25 eldiń qataryna kirdi

- Alǵash ret 2030 jylǵa deıingi «Qazaqstan balalary» tujyrymdamasy qabyldanyp, balalarǵa kórsetiletin memlekettik qoldaýdyń barlyq sharalary biryńǵaı júıege biriktirildi. Tujyrymdamany iske asyrý úshin 10 ındıkator jáne 158 is-shara kózdelgen. 1 qyrkúıekten bastap balalardyń áleýmettik-emotsıonaldyq daǵdylaryn qalyptastyrýǵa jáne ómirlik turaqtylyǵyn damytýǵa negizdelgen «Jeke qaýipsizdik» kýrsy oqytylady. Sonymen qatar Biryńǵaı tsıfrlyq memlekettik dıagnostıkalyq platforma engiziledi. Ol balalardyń jaǵdaıyn júıeli túrde baqylaýǵa, testileýge formaldy kózqarasty boldyrmaýǵa jáne Ulttyq bilim berý derekter qoryn transformatsııalaý aıasynda balany úzdiksiz súıemeldeýdi qamtamasyz etýge múmkindik beredi, - dedi mınıstr.

Onyń atap ótýinshe, 2026 jyly elimizdiń barlyq óńirinde Balalardyń quqyqtaryn qorǵaý basqarmalary quryldy. Olardyń negizgi mindetteri – balalardyń quqyqtaryn qorǵaý jumystaryn úılestirý, zorlyq-zombylyqtan zardap shekken balalardy súıemeldeý, Psıhologııalyq qoldaý kórsetý ortalyqtarynyń qyzmetin úılestirý jáne bala quqyqtarynyń buzylýyn erte anyqtaý.

- Júrgizilip jatqan jumystar halyqaralyq deńgeıde de joǵary baǵalandy. 2025 jylǵy qańtar jáne maýsym aılarynda Birikken Ulttar Uıymyna múshe memleketter Qazaqstannyń negizgi quqyqtary men bostandyqtaryna, onyń ishinde balalardyń quqyqtaryn qamtamasyz etýge baǵyttalǵan reformalarǵa joǵary baǵa berdi. ıÝNISEF Qazaqstandy Ortalyq Azııa elderi, sondaı-aq birqatar Eýropa memleketteri úshin balalardyń quqyqtaryn qorǵaý salasyndaǵy úlgi retinde atap ótedi. Sonymen birge aýqymdy reformalar halyqaralyq deńgeıde de moıyndaldy. KidsRights Index 2026 reıtıngindegi Qazaqstannyń pozıtsııasy elimizde balalardyń quqyqtaryn qorǵaý salasynda berik negiz qalyptasqanyn kórsetedi. Qazaqstan 194 memlekettiń ishinde 24-orynǵa ıe bolyp, jahandyq TOP-25 qataryna endi, - dedi Juldyz Súleımenova.

Buǵan deıin jańa oqý jylynda oqýshylar qandaı kýrstardy mindetti túrde oqıtynyn jazǵan edik.