Elimiz atom elektr stansasyn salýǵa qarjyny qaıdan almaq

ASTANA. KAZINFORM — Ázirge atom elektr stansasyn salýǵa qarjynyń qandaı kózden alynatyny naqty belgisiz. Degenmen Ulttyq ekonomıka mınıstriniń orynbasary Arman Qasenov birneshe álemdik tájirıbeni mysalǵa keltirdi.

— Aldymen jetkizýshi anyqtalady, sodan keıin joba qurylymy daıyndalady. Sodan soń jobanyń ózi, oǵan qoldanylatyn tehnologııalar men onyń quny boıynsha naqtylaý jumystary júrgiziledi. Ázirge bul máseleler ashyq kúıde qalyp otyr, naqty sheshim qabyldanǵan joq. Sheshimder belgili bolǵanda, qarjylandyrý qandaı qarajat esebinen júrgiziletinin anyqtaımyz, — dedi Arman Qasenov Úkimet otyrysynan keıin ótken baspasóz máslıhatynda.

Vıtse-mınıstrdiń málimdeýinshe, AES qurylysyna sheteldik jabdyqty paıdalanǵan jaǵdaıda eksporttyq-nesıelik agenttikter arqyly nesıe qarastyrylýy múmkin. 

— Mysaly, Qytaıdan jabdyq satyp alsa, ony qarjylandyrýmen Qytaıdyń «Eksımbanki» aınalysady, Germanııada «Germes» agenttigi, al AQSh-ta «Eksımbank» bar. Olar áleýetti qarjylandyrý kózi bola alady. Sonymen qatar, halyqaralyq damý ınstıtýttary da qarjylandyrýdy qamtamasyz etetin yqtımal kózi retinde qarastyrylady. Jalpy álemdik tájirıbede elektr energetıkasy men turǵyn úı-kommýnaldyq sharýashylyq salasyndaǵy jobalar táýekeli tómen sanalady. Munda qarjynyń tabylatynyna jáne onyń tıimdi shartpen usynylatynyna eshqandaı kúmán joq, — dep túsindirdi mınıstrdiń orynbasary.

Aıta keteıik, Úkimet alǵashqy atom elektr stansasyn Almaty oblysynyń Jambyl aýdany aýmaǵynda salý týraly sheshim qabyldady.

Premer-mınıstr Oljas Bektenov AES salýda ekonomıkalyq tıimdilikti qamtamasyz etý qajet ekenin aıtqan bolatyn. 

Sondaı-aq Energetıka mınıstri Almasadam Sátqalıev alǵashqy atom elektr stansasynyń qurylysy qashan bastalatynyna qatysty pikir bildirgen edi.