Elimiz 100 turǵyndy 15 beınebaqylaý kamerasy qadaǵalaıtyn deńgeıge jetkizilmek

ASTANA. KAZINFORM – Elimizdiń aýmaǵynda ornatylǵan beınebaqylaý kameralarynyń kómegimen 5 myń qylmys anyqtaldy. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.

- ІІM quqyq buzýshylyqtyń aldyn alýda tsıfrlyq sheshimderdi keńinen qoldanady. «Jedel basqarý ortalyqtaryna shyǵara otyryp eldi mekenderdi jappaı beınebaqylaý júıelerimen qamtý» jobasy aıasynda el aýmaǵyn ishki ister organdaryna shyǵara otyryp beınekameralarmen (100 turǵynǵa shaqqanda 15 beınebaqylaý kamerasy esebinen 3 mln kameranyń bolýy talap etiledi) barynsha qamtý josparlanýda. Qazirgi ýaqytta joba aıasynda qoǵamdyq oryndarda jáne kóshelerde 1,4 mln beınebaqylaý kamerasy jumys isteıdi. Onyń 386 myńy polıtsııanyń JBO-ǵa jáne kezekshi bólimderine qosylǵan, - dedi Úkimet basshysy.

Premer-mınıstr dereginshe, beınebaqylaý júıeleriniń kómegimen 5 myń qylmystyq jáne 317,3 myń ákimshilik quqyq buzýshylyq anyqtaldy.

- Sonymen qatar, bet-álpetti taný júıeleri (analıtıkalyq fýnktsııalary bar 19 myń kamera) approbatsııalanýda. Olardyń kómegimen 569 adam anyqtalyp, ustaldy. Azamattar kóp jınalatyn oryndarda beınekameralary, dınamıkasy, mıkrofony jáne polıtsııaǵa júginýge arnalǵan túımesi bar «SOS» túımeleri ornatylǵan. Beınekameralardy ornatý jáne olardyń sanyn kóbeıtý máselesi turaqty baqylaýda, - dedi ol.

Esterińizge sala ketsek, senator Gennadıı Shıpovskıh elimizde buzaqylyq áreketter — mektepterdegi agressıvti minez-qulyqtan bastap, kóshedegi tóbelester kóbeıip bara jatqanyna alańdaýshylyq tanytyp, Úkimet basshysynyń atyna depýtattyq saýal joldaǵan edi.

Osy saýalǵa jaýap bergen Úkimet basshysy 2025 jyldyń 1 qyrkúıeginen usaq buzaqylyq úshin jaza kúsheıtiletindigin aıtady.