Elimiz 10 aıda 48,4 mlrd dollarǵa elektr energetıka taýaryn satyp aldy

ASTANA. KAZINFORM — Qazaqstan elektr energetıkasy taýarlaryn satyp alýda 42,6 paıyz ımportqa táýeldi. Bul týraly Májilis depýtaty Edil Jańbyrshın málim etti.

— Bizdiń elimiz bıyl 10 aıda 48,4 mlrd dollarǵa elektr energetıka taýaryn satyp aldy. Onyń ishinde 1,8 mlrd dollarǵa otyn energetıkasy taýarlaryn, 4,88 mlrd dollarǵa metall jáne metaldan jasaıtyn buıymdar jáne 20 mlrd dollardan astam somaǵa kólik quraldary men apparattary syrttan satyp alyndy. Demek elektr energetıkasy taýarlary boıynsha 42,6 paıyz ımportqa táýeldimiz, — dedi Edil Jańbyrshın elordada «Elektr energetıka salasyndaǵy otandyq taýar óndirýshilerdi memlekettik qoldaý sharalary» atty taqyrypta ótken dóńgelek ústelde.

Odan ári Májilis depýtaty birneshe elmen elektr energetıkasy salasyndaǵy kelisimsharttyń jasalyp jatqanyn málimdedi. Onyń qatarynda Saýd Arabııasy, BAÁ jáne Qatar elderi bar. 

— Bizge aldymen elektr energetıkasy boıynsha qandaı taýarlardy syrttan satyp alyp jatyrmyz sonyń bazasyn jasaý kerek. Ekinshiden, elimizde elektr energetıkasy óndirýshi uıymdardyń onyń ishinde iri kompanııalardan bastap, kásiporyndar men jaýapkershiligi shekteýli seriktestikterdiń tizimin jasaqtaý qajet, ıaǵnı otandyq taýar óndirýshilerdiń pýlyn qurýymyz tıis. Kelesi quzyrly organdar men taýar óndirýshilerdiń basyn qosyp, ortaq máselelerdi birlesip talqylaý qajet. Tórtinshiden, zańnamany jetildirý kerek. Prezıdent otandyq taýarlardy satyp alý úlesin 60%-ǵa jetkizý kerektigin basa aıtty, — dep túsindirdi halyq qalaýlysy.

Buǵan deıin habarlaǵanymyzdaı elimizdegi elektr stansalary men elektr jelileriniń 70 paıyzyn jańǵyrtý qajet, ıaǵnı tozǵan.