Elmıra Syzdyqova Azııa oıyndarynan keıin karerasyna qatysty sheshim qabyldady
ASTANA. KAZINFORM — Azııa oıyndarynda áıelder kúresinen Qazaqstan namysyn qorǵaǵan balýandar elge oraldy, dep habarlaıdy INFORMSPORTS.
Olardyń qatarynda kúmis júldeger Elmıra Syzdyqova men qola medal ıegerń Zeınep Baıanova bar.
Ulttyq quramanyń bas bapkeri Nursultan Temirov sary qurlyq dodasyn qorytyndylap, komanda aldyna qoıylǵan maqsattyń oryndalǵanyn aıtty.
— Menińshe, Azııa oıyndarynda qoıǵan maqsat, josparymyz tolyq oryndaldy. Qyzdarymyz jaqsy óner kórsetti. Azııa qurlyǵynda myqty derjavalar bar. Solardyń arasynda tórtinshi oryn aldyq. Altyn júlde úshin daıyndyq ta, múmkindik te jetkilikti boldy. Biraq sál sabyr men sáttilik jetispedi. Aldaǵy ýaqytta áıelder kúresin budan da joǵary deńgeıde damytýǵa kúsh salamyz, — dedi Nursultan Temirov.
Al tájirıbeli balýan Elmıra Syzdyqova jarysta altyn júldege qol jetkize almaǵanyna toqtalyp, oǵan daıyndyqtyń azdyǵy men taktıkalyq qatelikter áser etkenin aıtty.
— Jarys óte joǵary deńgeıde ótti. Bir ókinishtisi, altyn júlde ala almadym. Maǵan sál ýaqyt jetpedi. Sebebi Azııa oıyndaryna úsh aı daıyndaldym. Sondaı-aq taktıkalyq jaǵynan da kemshilikter ketti, — dedi Elmıra Syzdyqova.
Qaraǵandylyq sportshy aldaǵy josparyn aıtyp, Astanada ótetin álem chempıonatyna qatyspaıtynyn jetkizdi.
— Bizde on birinshi qazannan bastap álem chempıonatyna arnalǵan oqý-jattyǵý jıyny bastalady. Qyzdar daıyndalady. Men solarǵa kómektesemin. Ózim Astanadaǵy álem chempıonatyna qatyspaımyn. Endigi basty maqsatym — Los-Andjeles Olımpıadasyna baq synaý, — dedi balýan.
Al Zeınep Baıanova jartylaı fınaldaǵy beldesýde ózin fızıkalyq turǵydan álsiz sezingenin aıtty. Sondaı-aq ol jańa salmaqqa aýysqanyna kóp ýaqyt bolmaǵanyn atap ótti.
— Jartylaı fınaldaǵy qarsylasym myqty balýan boldy. Ózimdi fızıkalyq turǵydan sál álsiz sezindim. Buǵan qosa, alǵan jaraqatym bar. Jańa salmaqqa aýysqanyma kóp ýaqyt bolǵan joq. 50 keli salmaǵy meniń oń jambasyma jaqsy keledi eken. Aldaǵy ýaqytta júıeli túrde daıyndalyp, Astanadaǵy álem chempıonatynda júldege iligýdi kózdep otyrmyn, — dedi Zeınep Baıanova.
Aıta keteıik, Japonııada ótken Azııa oıyndarynda el qorjynyna áıelder kúresinen balýandarymyz 1 kúmis, 2 qola medal enshiledi.
