Elmıra Syzdyqova áıelder kúresinen Islam oıyndarynda úshinshi oryn aldy
ASTANA.KAZINFORM - Qazaqstandyq Elmıra Syzdyqova Er-Rııadtaǵy (Saýd Arabııasy) Islam yntymaqtastyǵy oıyndarynda úshinshi orynǵa ıe boldy.
Áıelder kúresinen ulttyq qurama ókili 76 kelige deıingi salmaqta qola medal aldy. QR UOK málimetinshe, úshinshi oryn úshin ótken kezdesýde Syzdyqova Túrkııa ókili Elmıra ıAsındi jeńdi.
Otandasymyz jarystan keıingi suqbatynda basty maqsaty jaıly aıtty.
– Negizi, barlyǵy oıdaǵydaı ótti. Bas bapker jarys aldynda jospar qurǵan edi, sol josparǵa sáıkes jumys istedik. Bul qyzben birinshi ret kezdesip otyrmyz. Bas bapker qoıǵan taktıka boıynsha daıyndaldym. Taktıkalyq jaǵynan qol jumysyna basymdyq berip, qorǵanýdy aldyn ala josparladyq. Alda ótetin Qazaqstan chempıonatynda basty maqsatym - chempıon ataný, - dedi Elmıra.
Aıta keteıik, Qazaqstannyń erler quramasy semserlesýden Islam oıyndarynyń chempıony atandy.
Ramazan Kýsaınov Islam oıyndarynyń kúmis júldegeri boldy.
Djıý-djıtsý sheberi Aldııar Serik Islam oıyndarynyń jeńimpazy atandy.