El mektepterinde sadaq atýdan tegin sektsııalar iske qosylady
ALMATY. KAZINFORM — Іri qalalardaǵy memlekettik mektepterde pılottyq joba aıasynda sadaq atýdan tegin sektsııalar ashyla bastady. Bul bastama salaýatty ómir saltyn nasıhattaýǵa jáne ulttyq sporttyń qoljetimdiligin arttyrýǵa baǵyttalǵan.
QR Ulttyq Sadaq atý federatsııasynyń atqarýshy dırektory Edil Temirbekovtiń aıtýynsha, mektep — balalardy osy sport túrimen tanystyrý úshin eń qolaıly alań. Sadaq atý oqýshylardyń zeıinin shoǵyrlandyrýǵa, sabyrlyqqa, tózimdilik pen ózin-ózi baqylaý qabiletin damytýǵa kómektesedi.
Joba Týrızm jáne sport mınıstrliginiń, Sportty damytý dırektsııasynyń jáne óńirlik ákimdikterdiń belsendi qoldaýymen júzege asyrylyp jatyr. Memlekettik qoldaý óńirlerdi qajetti qural-jabdyqtarmen qamtamasyz etýden bastap, bilikti kadrlardy daıarlaýǵa deıingi negizgi materıaldyq-tehnıkalyq máselelerdi sheshýge múmkindik beredi. Sadaq atý — tehnıkalyq turǵydan kúrdeli sport túri, munda jabdyqtar (sadaq, jebeler) balanyń jeke fızıkalyq kórsetkishterine qaraı tańdalady. Memleket qoldaýy jas qazaqstandyqtardyń zamanaýı ári qaýipsiz jabdyqtarmen tegin jattyǵýy úshin materıaldyq bazany jańartýǵa kómektesepek.
Mektep toptaryn damytý — bul sporttyq rezervti daıarlaýdyń júıesin qurýdyń birinshi kezeńi. Eń qabiletti oqýshylar bolashaqta arnaıy sport mektepteri men sektsııalaryna aýysa alady. Jas sadaqshylar turaqty tájirıbe jınaqtaýy úshin elde Qazaqstan Respýblıkasynyń jastar lıgasy belsendi túrde damyp keledi. U-15 jáne U-18 jas sanattaryna arnalǵan jarystar búkil elden kelgen jastarǵa saıysqa túsip, babyn saqtaýǵa jáne óz jetistikterin shynaıy baǵalaýǵa múmkindik beredi.
— Biz birizdi modeldi qalyptastyrýǵa umtylamyz: balalarǵa arnalǵan mektep sektsııasy, U-15 lıgasy, U-18 jarystary, U-21 jastar quramasy jáne sońynda ulttyq komanda. Árbir talantty bala birinshi jebesinen bastap úlken arenalarǵa deıingi óz jolyn naqty túsinýi tıis, — dep atap ótti Edil Temirbekov.
Kadrlyq áleýetti nyǵaıtýdaǵy kelesi qadam Astana qalasyndaǵy Qazaqstan ulttyq sport ýnıversıtetiniń bazasynda Sadaq atý arnaıy akademııasyn ashý bolmaq. Bul ortalyq jańa jattyqtyrýshylardy, tóreshilerdi jáne sala mamandaryn oqytýmen aınalysady. Qazirgi ýaqytta respýblıkanyń resmı tiziliminde 1 207 sportshy men 95 dıplom alǵan jattyqtyrýshy tirkelgen, al mektep jobalary arqyly bul kórsetkishterdi júıeli túrde arttyrý josparlanyp otyr.
Eske salaıyq, Qazaqstan Azııa Para oıyndarynda sadaq atýdan alǵash ret kúmis medal enshiledi.
