Elime tarıhı júlde syılaǵanym úshin baqyttymyn — Narıman Qurbanov
PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda sporttyq gımnastıkadan kúmis medal jeńip alǵan Narıman Qurbanov jeńisten keıingi áserin bólisti.
«Snarıadqa keldim de, kombınatsııa bastalar aldynda basqa eshteńe oılamaı, tek jattyǵýdy sońyna deıin oryndadym. Іs-qımyldyń bárin qalaı sátti oryndap shyqqanymdy ózim de túsinbeı turmyn. Uzaq jyldar boıy jasap júrgen kombınatsııany avtomatty túrde oryndap shyqtym. Qazirgi olımpıadalyq tsıkldi esepke alar bolsaq, men baǵdarlama sońynda jıi qulaıtynmyn. Bul meniń tehnıkalyq nemese taktıkalyq turǵydaǵy kemshiligim emes. Psıhologııalyq turǵydan berilip qoıatynmyn. Búgin bar tájirıbemdi jınap, eń mańyzdy týrnırde bilgenimdi túgel oryndadym. Sonyń nátıjesinde osyndaı jetistikke qol jetkizip otyrmyn», — dedi sportshy.
Sonymen qatar, Parıj Olımpıadasynyń medali alǵash tanystyrylǵanda sonyń sýretin ózine saqtap qoıǵanyn, sol medalǵa qol jetkizýdi armandaǵanyn da atap ótti.
«Osy maýsymdaǵy árbir jarys aldynda sol sýretke qarap, osy medaldi qaıtsem de alamyn dep aldyma maqsat qoıdym. Mine, búgin sol maqsatqa jettim. Jáne sol maqsatqa jetý úshin jumys istedim. Elimizde bul medaldi qalaı qabyldaıtynyn, halyqtyń qalaı qýanyp jatqanyn jaqsy túsinemin. Qazir bul medaldi ustaǵannan buryn elimizdiń qýanyp jatqanyn kórý — men úshin baqyt. Elime tarıhı júlde syılaǵanym úshin baqttymyn», — dedi Qurbanov.
Esterińizge sala keteıik, búgin el qorjynyna Parıj Olımpıadasynyń tuńǵysh kúmis júldesi tústi.
Ony sporttyq gımnastıkanyń at snarıadyndaǵy jattyǵýda Narıman Qurbanov jeńip aldy.
