Elızaveta II Covid-19 indetine qarsy kúreske úles qosqan 100 jastaǵy ardagerge «seri» ataǵyn berdi
NUR-SULTAN. QazAqparat – Ulybrıtanııanyń Patshaıymy Elızaveta II Ulttyq densaýlyq saqtaý qyzmeti úshin 32 mln fýnt sterlıng jınaǵan Ekinshi dúnıejúzilik soǵystyń ardager Tom Mýrdy rytsarlyqqa kóterdi, dep habarlaıdy QazAqparat koroldik otbasynyń saıtyna silteme jasap.
«Búgin ser kapıtan Tom Mýrdyń qarajat jınaý boıynsha jetistigi rytsarlyq ataqpen atalyp ótti», - delingen resmı habarlamada.
Rytsarlyqqa kóterý Vındzor qamalynda boldy. Onda Tom Mýrdyń búkil otbasy músheleri shaqyryldy.
100 jasyna bir aı burynǵy sáýir aıynyń basynda Tom Mýr Tom’s 100th Birthday Walk For The NHS qaıyrymdylyq aktsııasyn bastaǵan edi. Ardager koronavırýspen kúreste Ulybrıtanııanyń ulttyq densaýlyq saqtaý qyzmetine qarajat jınaý úshin úıdiń baǵyn 100 ret aınalyp shyǵýǵa ýáde bergen. Aktsııa halyq pen tanymal adamdardyń qoldaýyna ıe boldy. Osylaısha azamattar 32 mln fýnt stergıng (41 mln dollar) jınap berdi.
Tom Mýr 1920 jyly Ulybrıtanııanyń Ýest-Iorkshır graftyǵynda dúnıege kelgen. Úndistan men Bırmada áskerı qyzmetin ótegen. 1945 jyly aǵylshyn-úndi jáne japon áskeri arasyndaǵy Ramrı aralyndaǵy soǵysqa qatysqan. Eline oralǵannan keıin tank mektebinde nusqaýshy bolyp eńbek etken.
