Elızabet Tursynbaevanyń ákesi: Biz Olımpıadadan bas tartqymyz kelgen

- Baıtaq Ábilhanuly, qyzyńyzdyń Olımpıadadaǵy kórsetkishine kóńilińiz toldy ma?

- Anasy ekeýmiz qyzymyzdyń eń jaqyn jankúıerimiz. Sondaı-aq, jarysta janynan birinshi bolyp tabylatyn birden-bir qoldaýshysy bolǵandyqtan bul suraq bizge qıyndaý tıedi. Degenmen, biz Elızabetten budan da joǵary ball alady dep úmittendik. Alaıda, tóreshiler qaýymy bar bolǵany  57.95 upaı berdi. Eń bastysy, kelesi kezeńge, ıaǵnı erkin baǵdarlamaǵa qatysýǵa múmkindik aldy.

- Tóreshilerdiń bergen baǵasyna renjýli tárizdisiz?

- Joq, olaı emes, tóreshilerge kiná taǵýdan aýlaqpyn. Qyzym bar múmkindigin kórsete almady. Negizi, josparymyz boıynsha úzdik bestikke kirýi kerek edi.

- Oǵan ne sebep boldy dep esepteısiz?

 

- Bári alǵan jaraqatyna baılanysty. Osydan bir aı buryn aıaǵynan jaraqat alǵan bolatyn. Biz Olımpıada oıyndary jaqyndaǵan saıyn jattyǵýdan góri dárigerge barǵanymyz kóbeıip ketti. Báribir jaraqatynan tolyq aıyǵa almaǵan sportshy jarys kezinde bar múmkindigin kórsete almaıdy eken. Biz búgin osyny túsindik.

Elızabet Olımpıada aldynda jaraqat alǵannan keıin, óz-ózine kele almaı biraz ýaqytyn joǵaltyp aldy. Sosyn, biz anasy, qyzym úsheýimiz aqyldasa kele Olımpıada oıyndaryna eki apta ýaqyt qalǵanda jarystan bas tartý qajet dep sheshtik. Sol kezde qyzym «ne bolsa da baǵymdy synap kóreıin. Joldamany teginnen tegin utyp alǵan joqpyn ǵoı. Júldege talasa almasam da, tájirıbe alyp qaıtamyn», dedi. Sosyn biz de sheshimimizdi ózgerttik.

- Múmkin, Elızabettiń birinshi Olımpıadasy bolǵandyqtan qobaljý da bolǵan shyǵar...

 

- Ondaı qatty qobaljý boldy dep eseptemeımin. Anasy ekeýmiz qasyndamyz. Kúnde birge ony jigerlendirip, shabyttandyryp qoıamyz. Ózi de óte jaqsy kóńil-kúıde boldy. Biraq, jańaǵy sekiretin jerinde, bir aıaqpen turyp aınalatyn kezinde jaraqatyna baılanysty jattyǵýdy tolyq aıaqtaı almady. Ne isteımiz, bári Allanyń buıryǵymen bolady. Biraq, Alla bárin bere salady dep jatýdan da aýlaqpyz. Osyǵan deıin qanshama eńbektendik, ter tóktik. Olımpıada oıyndarynda júlde alý bylaı tursyn, joldamaǵa qol jetkizýdiń ózi qanshalyqty qıyn ekenin sizder de jaqsy biletin shyǵarsyzdar. Mine, ózderińiz kórip otyrsyzdar, Elızabet mánerlep syrǵanaýdan tuńǵysh ret áıelder arasynda qazaq eline eki joldama alyp berdi. Bunyń ózi úlken eńbek dep esepteımin. Búgin álem jurty Qazaqstanda da mánerlep syrǵanaıtyn qazaq qyzdary bar ekenin kórip, bilip jatyr. Men jalpy qyzymdy maqtan tutamyn, maqtanamyn. Bul joly Olımpıadada júlde almasa da úlken tájirıbe jınap qaıtamyz.

- Alda erkin baǵdarlama bar. Óz josparlaryńyz boıynsha, qossaıys qorytyndysynda neshinshi orynnan kórinýdi mejelep otyrsyzdar?

- Bizdiń maqsatymyz - qossaıys qorytyndysy boıynsha alǵashqy ondyqqa kirý. Áli oǵan deıin eki kún bar. Daıyndyǵymyzdy ary qaraı pysyqtaıtyn bolamyz.

- Elızabettiń bapkerleri týraly pikirińizdi bildire ketseńiz?

- Qyzymnyń bapkeri Braıan Orser degen álemge tanymal azamat. Ózi de kezinde sportshy bolǵan. Osyǵan deıin talaı chempıondardy tárbıelep shyǵardy. Ol azamatqa alǵystan basqa aıtarym joq. Aldaǵy ýaqytta áli de birlese jumys jasaıtyn bolamyz.

 

- Endi Olımpıada oıyndarynan keıin Elızabettiń qandaı josparlary bar?

- Olımpıada oıyndarynan keıin Elızabettiń sporttaǵy jarystary aıaqtalmaıdy. Alda baǵyndyratyn bıikter óte kóp. Osy tórtjyldyq doda aıaqtala salysymen qyzym sheshesimen birge Kanadaǵa ketedi. Ol jaqta bir jaǵynan em alsa, ekinshiden, qaıta jattyǵýǵa kirisedi. Al men Almatyǵa qaıtamyn.

- Endi, áńgimeni ótken kúnderge qaraı buryp, qyzyńyzdyń bul sportqa qalaı kelgenin, ne túrtki bolǵany jaıynda aıtyp berseńiz...

- Meniń úsh balam bar. Elızabet - kenjesi. Kishkentaı kezinde densaýlyǵy nashar boldy. Óte kóp aýyra beretin. Aldynda Arman, Tımýr degen eki aǵasy bar. Eń áýeli sporttyń bul túrimen ekinshi aǵasy Tımýr aınalysty. Biz ol kezde Reseıde turatynbyz. Elızabet sol Reseıde dúnıege keldi. Tımýr kóptegen jarystarǵa qatysyp, júlde alyp júrdi. Biraz bıikterdi baǵyndyrdy. Sosyn, Elızabetti de aǵasynyń qasynda júrsin, bir jaǵynan sportpen aınalyssa, densaýlyǵyna paıdasy tıer degen maqsatpen sporttyń osy túrine alyp bardyq.

- Ol kezde qyzyńyzdy osyndaı tórtkil dúnıe kóz tigetin tórtjyldyq dodada qazaq eliniń namysyn qorǵaıdy degen oı bolmaǵan da shyǵar?

- Jasyratyny joq, ondaı oı bolǵan joq. Sol kezdegi anasy ekeýmizdiń basty maqsatymyz qyzymyzdyń densaýlyǵyn ýaqytsha sportqa berý arqyly qalpyna keltirý bolatyn. Ary qaraı sportty jalǵastyrady degen oı da bolǵan joq.

 

- Sportqa neshe jasynan bastap bardy?

- Bes jasynan. Qyzym muz aıdynda alǵash syrǵanap úırenýdi Reseıde bastady. Keıin, óziniń de qyzyǵýshylyǵy artyp, bos ýaqyty bolsa, muz aıdynǵa baryp jattyǵý jasaıtyn boldy. Sosyn, biz arnaıy jas jetkinshekterdi tárbıeleıtin úıirmelerge jazdyryp, tárbıeshilerge tapsyrdyq. Elızabetti aldymen aǵasy jattyǵatyn úıirmege alyp bardym. Olar qabyldamady. Sosyn, qyzymdy eki-úsh aıǵa aıran-sút iship, kishkene qýattanyp kelsin dep aýylǵa ata-ájeleriniń qolyna jiberdim. Kelgen soń taǵy bir úıirmege alyp bardym. Olar da alǵashynda aýyldan kelgen eshteńe bilmeıtin bala dep almaı qoıdy. Sonda da qaıta-qaıta baryp júrip, aqyry kirgizdim. Olar «úsh aı synap kóremiz, osy ýaqytta esh nátıje bolmasa bizge renjimeısiz», dedi. Birden kelistim. Úsh aı ótti. Qyzym ustazdarynyń kóńilinen shyǵyp, ary qaraı sonda qaldy. Tipti, sol úıirmedegi eń úzdik balalardyń biri atandy. Reseıdiń ishki birinshilikterinde qarsylas shaq keltirmeı, bıikterden kórine bastady.

- Al, elge qashan keldińizder?

- Men ózim Qyzylorda oblysynyń týmasymyn. Belgili bir sebepterge baılanysty 1992 jyly Máskeýge kóship bardyq. Sosyn, 2013 jyly Qyzylorda oblysynyń ákimi Qyrymbek Kósherbaevtyń tikeleı shaqyrýymen ata-jurtymyzǵa qaıta kóship keldik. Osy jyldan bastap qyzym qazaq eliniń atynan synǵa túse bastady. Mine, sodan beri ár jarystarda óz eliniń týyn jamylyp, namysyn qorǵap, bıik belesterge qol jetkizip, elimizdiń mártebesin kóterip jatyr.

- Qazir Qazaqstanda mánerlep syrǵanaýǵa qanshalyqty kóńil bólingen?

 

- Sońǵy jyldary jaqsy nazar aýdarylyp jatyr. Qyzylorda oblysynyń ákimdigine, QR Mádenıet jáne sport mınıstrligine, sondaı-aq, Ulttyq Olımpıada komıtetine alǵysymyz sheksiz. Jyl saıyn shetelde ótetin barlyq jarystardan qaldyrmaı, jiberip jatyr. Ne kerek, barlyq jaǵdaıdy jasap jatyr. Jalpy Qazaqstanda bolashaqta qysqy sporttyń bolashaǵy jarqyn bolady degen senimdemin.

 

- Áńgimeńizge rahmet!