Elızabet Tursynbaeva úzdik mánerlep syrǵanaýshylary reıtınginde altynshy oryn aldy
NUR-SULTAN. QazAqparat - Qazaqstandyq mánerlep syrǵanaýshy Elızabet Tursynbaeva 2018/2019 maýsymynan keıin Halyqaralyq konkıshiler odaǵynyń (ISU) jańartylǵan reıtınginde úzdik ondyqqa kirdi, dep habarlaıdy QazAqparat Olympic.kz saıtyna silteme jasap.
Aıta keteıik, reıtıngti jasaǵan kezde aıaqtalǵan jáne aldaǵy maýsymdaǵy álem chempıonaty men Olımpıada oıyndarynyń nátıjesi, sol maýsymdar men jekelegen halyqaralyq jarystardyń Gran-prı kezeńderiniń úzdik nátıjeleri esepke alynady.
Áıelder arasynda birinshi oryndy reseılik Alına Zagıtova alǵan. Onyń aktıvinde 4510 upaı bar. Ekinshi oryndy japondyq Satoka Mııahara - 3459 upaımen ıelengen. Úshinshi oryndy reseılik Evgenııa Medvedeva - 3384 upaımen aldy. Tursynbaeva 3108 upaımen altynshy orynǵa ıe boldy. Soǵan qaramastan, Elızabet maýsymdaǵy jeke reıtıngte tórtinshi orynda tur. Eske salaıyq, bıyl Tursynbaeva álem chempıonatynda kúmis júldege ıe boldy.
