Elızabet Tursynbaeva uzaq úzilisten keıin jattyǵýǵa qaıta kiristi
NUR-SULTAN. QazAqparat - Mánerlep syrǵanaýdan álem chempıonatynyń kúmis júldegeri Elızabet Tursynbaeva uzaq úzilisten keıin jattyǵýǵa kiristi. Bul týraly ol Olympic.kz saıtyna bergen suhbatynda aıtty.
Sondaı-aq, sportshy jańa maýsymdaǵy baǵdarlamasy týraly da áńgimeledi.
«Qazirgi tańda alǵashqy jattyǵýlar qalypty, óz dárejesinde ótip jatyr. Jańa maýsymda jańa baǵdarlamany josparlap otyrǵan joqpyn. Meniń bilýimshe, Gran prı ulttyq formatta ótedi jáne jarystaǵy upaılar reıtıngke engizilmeıdi. Al men Gran-prıge qatyspaımyn. Oqýyma qatysty aıtar bolsam, maǵan óte unaıdy. Kóp jańa aqparattar, sonymen qatar, úı jumysy da kóp. Ázirge bárine úlgerip jatyrmyn», - deıdi Tursynbaeva.
Aıta keteıik, Elızabet Tursynbaeva bıyl Máskeý memlekettik halyqaralyq qatynastar ınstıtýtyna oqýǵa túsip, stýdent atandy.
