Elızabet Tursynbaeva Ýnıversıadada qoldaý bildirgen qazaqstandyqtarǵa alǵys aıtty
ASTANA. QazAqparat - Qazaqstandyq mánerlep syrǵanaýshy Elızabet Tursynbaeva «Ýnıversıada-2019» synyndaǵy kúmis medalinen keıin ózine qoldaý bildirgen jankúıerlerine alǵysyn bildirdi, dep habarlaıdy QazAqparat tilshisi.
Búgin Reseıdiń Krasnoıarsk qalasynda qyzdar arasynda mánerlep syrǵanaýdan saıys aıaqtaldy. Qyzylorda oblysynyń túlegi eki baǵdarlama nátıjesi boıynsha 214.77 upaı jınady. Atalmysh dodada jeńis 220.68 upaı jınaǵan Maıa Mıharanyń enshisinde ketse, úshinshi oryn 205.91 upaımen reseılik Stanıslava Konstantınovaǵa buıyrdy.
«Qazaqstannyń qorjynyna kúmis medal sala alǵanyma qýanyshtymyn. Osy saıysta qoldaý bildirgen barlyq jankúıerlerge rahmet aıtamyn», - dep alǵysyn bildirdi Elızabet Tursynbaeva.
Sonymen qatar, erkin baǵdarlamada óner kórsetkennen keıin Elızabet reseılik basylymdarǵa kúrdeli element - tórt rettik salhovtyń sátti oryndalmaýyn túsindirdi.
«Oıdaǵydaı oryndap shyqqanyma kóńilim tolyp otyr. Jattyǵý kezinde oryndap júrgenimmen tórt rettik salhov sátsiz boldy. Tórttik shamamen oryndaldy. Kúrdeli elementterdiń bárine kúsh qaıdan deseńizder - bári de jattyǵýdyń arqasy», - deıdi ol.
Elızabet Tursynbaevanyń «Ýnıversıada-2019» synyndaǵy óner kórsetkenin myna siltemeden kórýge bolady.
Eske sala ketsek, Elızabet Tursynbaeva qazirgi ýaqytta reseılik bapker Eterı Týtberıdzeniń jetekshiligimen jattyǵýda. 2018 jylǵy Olımpıadada Eterı Týtberıdzeniń shákirtteri Alına Zagıtova men Evgenııa Medvedeva altyn jáne kúmis medaldi jeńip alǵan bolatyn.
Elaman Turysbekov
