Elızabet Tursynbaeva qyzylordada sheberlik sabaǵyn ótkizdi
QYZYLORDA. QazAqparat - Qyzylorda qalasyndaǵy «Muz saraıy» sport kesheninde belgili mánerlep syrǵanaýshy Elızabet Tursynbaeva jergilikti jas órenderge sheberlik sabaǵyn ótkizdi, dep habarlaıdy QazAqparat tilshisi.
Syr óńiriniń sańlaǵy búgingi kúnge deıin 4 dúrkin Qazaqstan chempıony ataǵyna ıe boldy. Sondaı-aq, bıyl Ońtústik Koreıada ótken qysqy Olımpıada oıyndarynda el namysyn qorǵap qaıtty. Ol elimizde mánerlep syrǵanaý sportynan qyzdar arasynan mundaı joǵary deńgeıde synǵa túsip júrgen sanaýly sportshynyń biri sanalady.
Sheberlik dárisi barysynda ol jas órenderge mánerlep syrǵanaýdyń qyr-syryn úıretti. Sońǵy jyldarda Qyzylordada da sporttyń bul túri keńinen qanat jaıyp keledi.
«Men jas jetkinshektermen júzdesý barysynda olardyń atalmysh sportqa ynta-yqylasy joǵary ekenin ańǵardym. Olar keleshekte halyqaralyq arenalarda Qazaqstandy álemge tanytqysy keledi», - deıdi ol.
Ústimizdegi jyldyń qyrkúıek aıynan bastap Elızabet halyqaralyq jarystarǵa daıyndyǵyn bastaıdy. Keler jyly ony Reseıdiń Krasnoıarsk qalasynda ótetin qysqy ýnıversıada oıyndary men Japonııada alaýy jaǵylatyn álem chempıonaty sekildi dúbirli dodalar kútip tur. Qyzylordalyq sportshy mundaı jarystarda tuńǵysh ret baq synaıdy.
Ádiljan Úmbet
