Elızabet Tursynbaeva QR Máskeýdegi elshiliginde qonaqta boldy
MÁSKEÝ. QazAqparat - Qazaqstandyq tanymal sportshy, mánerlep syrǵanaýshy Elızabet Tursynbaeva Qazaqstannyń Reseıdegi elshiliginde qonaqta bolyp, qazaqstandyq dıplomattarmen kezdesti, dep habarlaıdy «QazAqparat» HAA menshikti tilshisi elshiliktiń baspasóz qyzmetine silteme jasap.
Emen-jarqyn jaǵdaıda ótken kezdesýde qazaqstandyq sportshy óziniń sporttaǵy ómiri, jeńis jolyndaǵy qıyndyqtar men jetistikteri týraly baıandady. Osy kúnde sportshy Reseıde ıÝlııa Lıpnıtskaıa, Alına Zagıtova syndy Olımpıada chempıondary men álemniń eki dúrkin jeńimpazy Evgenııa Medvedevany jattyqtarǵan tanymal bapker Eterı Týtberıdzeniń qolynda tálim alýda. Osyǵan deıin 5 jyl qatarynan Elızabet kanadalyq bapker Braıan Orserdiń jetekshiligimen jumys istegen bolatyn.
«Braıanmen biz jaqsy kóńil-kúımen qosh aıtystyq. Ol meni, meniń tańdaýymdy qoldady jáne meniń bapkerime de senim artty. Men onyń maǵan degen qamqorlyǵyna, osy ýaqytqa deıin úıretkenerine dán rızamyn»,-dedi mánerlep syrǵanaýshy.
«Jalpy óz úıinen, otbasynan jyraqta júrip jattyǵý óte qıyn. Keıde jetistigińdi eseleı túsý úshin ózgeris qajet. Men kelesi Olımpıadaǵa basqasha daıyndalǵym keledi. Eterı Georgıqyzy óte myqty bapker, men ózimniń onyń tobynda daıyndalýǵa múmkindik alǵanyma sheksiz qýanyshtymyn»,-deıdi Elızabet.
Tursynbaeva men Týtberıdze 2022 jyly Beıjińde ótetin qysqy Olımpıada oındaryna deıin birge jumys isteıtin bolady. 18 jastaǵy Elızabet Máskeýde týǵan, alaıda ol dúbirli dodalarda Qazaqstan atynan óner kórsetip júr. Phenchhanda ótken Olımpıada oıyndarynda 12-shi orynǵa taban tiredi. Ol álem chempıonattaryndaǵy úzdik kórsetkishine 2017 jyly qol jetkizdi. Elızabet 2017 jyly ótken qysqy Azııa oıyndarynyń jáne 2016 jylǵy jasóspirimder arasyndaǵy qysqy Olımpıada oıyndarynyń qola júldegeri.
«Biz úshin qazaqstandyqtardyń da, Sizdiń de qoldaýyńyz mańyzdy. Sizderdiń bizdiń jaǵdaıymyzǵa alańdaýshylyq bildirgenderińizdiń ózi bizdi aldyǵa jetelep, budan da úlken bıikterdi baǵyndyrýǵa yntylandyrady. Qazir 2022 jylǵy Olımpıada oıyndaryna daıyndyq júrip jatyr. Sondyqtan qazir biz úshin árbir sát mańyzdy»,-dep aǵynan jaryldy sportshynyń ákesi Baıtaq Tursynbaev.
