Elızabet Tursynbaeva endi reseılik bapkerden tálim alady
QYZYLORDA. QazAqparat - Belgili mánerlep syrǵanaýshy Elızabet Tursynbaeva endi reseılik maman Eterı Týtberıdzeden tálim alatyn boldy. Bilikti bapker men sportshy arasyndaǵy kelisimshart 2022 jylǵy Beıjiń Olımpıadasyna deıin jasalǵan, dep habarlaıdy QazAqparat tilshisi.
Qyzylordaǵa kelgen saparynda Elızabet Tursynbaeva osyndaı jańalyǵymen bólisti. Ol Eterı Týtberıdzemen 2012-2013 jyldarda da jumys jasaǵan edi. Odan keıingi bes jylda kanadalyq maman Braıan Orserden tálim aldy.
«Men endi Eterı Týtberıdzemen jumys jasaımyn. Buǵan deıin Braıan Orserdiń aqyl-keńesin aldym. Alda kóptegen jarystar kútip tur. 2019 jyldyń 4-10 aqpan aralyǵynda AQSh-tyń Anahaım qalasynda ótetin tórt qurlyq sheberleriniń basqosýynda el namysyn qorǵaımyn. Odan keıin 2-12 naýryz aralyǵynda Reseıdiń Krasnoıarsk qalasynda stýdentter arasynda búkilálemdik qysqy ýnıversıada jalaýyn kóteredi. Sondaı-aq, 18-24 naýryz aralyǵynda Japonııada mánerlep syrǵanaýdan álem chempıonaty bolady. Men sol jarystarǵa qatysýǵa ázirlik jasap júrmin», - dedi Elızabet Tursynbaeva.
Elızabet bıyl tuńǵysh ret eresekter arasyndaǵy qysqy Olımpıada oıyndarynda baq synady. Onda jekeleı synda qazaqstandyq sportshy Elızabet Tursynbaeva jalpy esepte 12-oryn aldy. Odan keıin 18-22 qyrkúıek aralyǵynda Slovakııanyń Bratıslava, 4-8 qazan aralyǵynda Fınlıandııanyń Espoo qalalarynda ótken Chelendjer serııasy boıynsha halyqaralyq týrnırlerde júldegerlar qatarynan kórindi.
«Elızabettiń osyndaı tolaǵaı tabystarǵa kenelýine bizdiń elimizdiń tarapynan úlken qoldaý jasalyp keledi. Qyzylorda oblysy basshylyǵy onyń túrli jarystarǵa qatysýyna qamqorlyq kórsetedi. Sondyqtan jasaǵan qamqorlyǵy úshin barlyq azamatqa alǵys bildiremin», - dedi Elızabettiń ákesi, sporttyq menedjeri Baıtaq Tursynbaev.
Sondaı-aq, bıyl sáýir aıynda Elızabet Tursynbaeva Qyzylordada óz izbasarlaryna sheberlik sabaǵyn ótkizdi. Bul jolǵy saparynda da jas órenderge tálim beretin bolady.
