«Elızabet Ledererdiń portreti» rekordtyq baǵaǵa satyldy
ASTANA. KAZINFORM — Gýstav Klımttiń «Elızabet Ledererdiń portreti» aýktsıonda 236,4 mln dollarǵa satylyp, eń qymbat zamanaýı óner týyndysy atandy, dep habarlaıdy NBC News.
Portret tek joǵary baǵasymen ǵana emes, sonymen qatar sırektigimen de tarıhı mańyzǵa ıe.
Jeke kollektsııalarda Klımttiń tolyq boıymen salynǵan nebári eki portreti ǵana qalǵan.
Olardyń biri eshqashan satylymǵa shyǵarylmaýy múmkin, al ekinshisi — osy portret.
1914 jáne 1916 jyldar aralyǵynda salynǵan portrette Elızabet Ledererdiń azııalyq oıý-órnekter arasynda ımperııalyq qytaı shapanyn kıip turǵany beınelengen.
Gýstav Klımttiń peızaj beınelengen eki kartınasy da satyldy: 1906 jyly sýretshi mansabynyń sharyqtaý sheginde salynǵan «Gúldengen shalǵyn» kartınasy 86 mln dollarǵa jáne 1917 jyly salynǵan «Atterze Ýnterlerindegi ormandy betkeı» kartınasy 68 mln dollarǵa satyldy. Sońǵysynda Aýstrııadaǵy Atterze kóline qaraıtyn qalyń orman beınelengen.
Úsh shyǵarma da qýǵyn-súrgin, soǵys, tasymaldaý jáne ýaqytqa qaramastan tamasha kúıinde saqtalǵan.
Aýktsıonda sondaı-aq Anrı Matıss, Van Gog jáne Edvard Mýnktiń jumystary qoıyldy. Mýnktiń «Jazǵy tún» kartınasy 35 mln dollarǵa satyldy.
Sotheby’s aýktsıony sońǵy jyldardaǵy eń kútilgen aýktsıondardyń biri boldy. Onda fılantrop, kosmetıka ımperııasynyń murageri jáne aty ańyzǵa aınalǵan kollektsıoner Leonard Laýderdiń men anasy Este Laýderdiń jeke kollektsııasy qoıyldy.
2020 jyly Rembrandt avtoportreti Sotheby’s vırtýaldy aýktsıonynda 14,5 mln fýntqa (18,7 mıllıon AQSh dollary) satyldy.